A Xbox celebra os seus 20 anos

luns, 15 de novembro do 2021 Marcus Fernández

Esta tarde Microsoft celebrou un evento para conmemorar o 20º aniversario da consola Xbox, aproveitando a ocasión para realizar anuncios importantes como que o 13 de decembro estrearase o documental Power On: La historia de Xbox, que a colección de xogos retrocompatibles incorporou 70 títulos de Xbox 360 e Xbox nas últimas horas e, como grande sorpresa, anunciouse o inicio da beta multixogador de balde de Halo Infinite e a primeira tempada do xogo tres semanas antes do previsto.
Halo Infinite chega en versión para Xbox One e Xbox Series X|S, así como para PC (plataforma para a que tamén está dispoñible a través de Steam), sendo o lanzamento oficial do xogo o 8 de decembro. Deste xeito, calquera usuario que o desexe pode comezar a gozar hoxe da experiencia de xogo de Halo Infinite, mantendo os elementos que consiga unha vez que o xogo pase a ser oficial tras a súa estrea, cando o xogo contará cunha campaña e un modo multixogador de balde, para recibir ao longo do ano que vén máis contido como os modos Forxa e cooperativo.

Vídeo do evento de celebración do 20º aniversario de Xbox

PUBLICIDADE