A Xunta amplía a cobertura da Rede Dixital de Emerxencias de Galicia
martes, 14 de febreiro do 2017
- Un dos obxectivos é facer máis eficaz a loita contra os incencios forestais en zonas rurais
A Xunta de Galicia vén
de ampliar a cobertura territorial e demográfica da Rede Dixital de
Emerxencias de Galicia (RESGAL), xestionada pola axencia AMTEGA
a través do operador público RETEGAL.
O obxectivo destes traballos foi, en palabras destas entidades,
“facer especial fincapé nas zonas con maior risco de incendio”.
A ampliación incluíu a instalación de 25 novas estacións radio
base, 4 repetidores e unha nova estación transportábel. Con isto,
explican, minimizáronse nun 34% as zonas de sombra no conxunto da
Comunidade e en máis dun 44% nas 565 parroquias identificadas como
de alto risco de incendio.
Segundo informan AMTEGA
e RETEGAL, o reforzo das infraestruturas de RESGAL amplía o seu
radio de acción en máis de 145.000 hectáreas, “o que lle permite
alcanzar o 90% do territorio e o 96,5% da poboación”. En termos
máis concretos, incrementouse a cobertura da Rede en localidades de
máis de 1.000 habitantes e nos hospitais de Barbanza (Ribeira) e
Burela.
Ademais, co obxectivo
de incrementar as medidas para a prevención de incendios, RETEGAL e
o Servizo de Prevención e Detección de Incendios Forestais
desenvolverán ao longo do primeiro semestre do ano “unha serie de
iniciativas tecnolóxicas innovadoras” no ámbito da
videovixilancia e na aplicación de sistemas de seguimento e
detección temperá de incendios zonas de alto risco. Para iso
instalaranse en infraestruturas de RETEGAL sensores, sistemas de
detección de fume, calor.. e cámaras de visión con rotación en
360º que permitirán, en palabras do operador público autonómico,
“localizar de xeito preciso o foco do incendio e xerar alertas de
xeito automático”.
RESGAL, como
lembraremos, é froito dun convenio de colaboración entre a
Consellerías de Presidencia, Administracións Públicas e Xustiza, a
Consellería do Medio Rural, a axencia AMTEGA e a entidade pública
estatal Red.es. Entrou en funcionamento en 2015 como unha rede única
para todos os colectivos que participan na resolución das
emerxencias. A finalidade de RESGAL é “facilitar e simplificar a
coordinación entre todos eles, empregando a tecnoloxía máis
avanzada neste tipo de redes”.
A día de hoxe están a
empregar RESGAL efectivos da AXEGA, da Policía Autonómica, do 061,
do 112, do Servizo de Protección e Defensa contra Incendios
Forestais, dos Consorcios de Bombeiros, e efectivos de emerxencias de
116 concellos, que xa se adheriron á Rede.
Estes efectivos
empregan dispositivos móbiles adaptados a condicións extremas. A
Administración autonómica adquiriu xa máis de 5.348 terminais.
Sinalar tamén que
RESGAL emprega tecnoloxía TETRA, que sería en palabras de RETEGAL
“a tecnoloxía máis punteira para este tipo de comunicacións, que
garante a súa dispoñibilidade cando o resto de redes de telefonía
móbil colapsan”. Este sistema, engade, “caracterízase pola súa
fiabilidade incluso en situacións extremas ou de saturación; e, a
diferenza dos sistemas convencionais, posibilita a realización de
chamadas en grupo, tanto dentro dunha mesma organización, como entre
dispositivos de distintas organizacións que nun intre dado poidan
estar traballando de maneira conxunta nunha mesma emerxencia”. A
tecnoloxía multiplica por cinco a velocidade de datos con respecto
ás redes de emerxencia habituais e posibilita a incorporación de
diversos servizos como a xeolocalización en tempo real da posición
de todos os dispositivos de emerxencia vía GPS.