A Xunta amplía a identificación electrónica co sistema Cl@ve, aberto á cidadanía da UE

Os usuarios da plataforma de Administración Electrónica da Xunta de Galicia xa poden empregar o sistema Cl@ve do Goberno de España para identificarse, ademais do sistema Chave 365 da Xunta, o DNI electrónico ou o certificado dixital. “Esta posibilidade”, explica a Consellería de Facenda, “abre as tramitacións da eAdministración galega á cidadanía da UE non residente en España que non dispoñen de NIF, que poden utilizar Cl@ve, a través do sistema europeo de recoñecemento de identidades electrónicas Nodo eIDAS”.
Facenda explica tamén que e os procedementos do sistema Cl@ve son moi similares aos da Chave 365 e que ambos teñen como obxectivo “proporcionar un uso sinxelo para o acceso aos trámites electrónicos de persoas que non dispoñen de certificado electrónico dende calquera tipo de dispositivo”.
Chave 365 permite, en todos os casos, tanto a identificación electrónica como a sinatura dixital. Sen embargo, Cl@ve ten dúas modalidades: a Cl@ve pin, pensado para un acceso á administración dixital máis ocasional, e a Cl@ve permanente, que esta pensada para unha relación máis constante coa administración dixital.
Ademais de acceder ás notificacións, as persoas que utilicen o sistema de acceso con Cl@ve pin ou permanente poderán realizar todos os procedementos da Administración Electrónica da Xunta, salvo a alta, baixa ou modificación de Chave 365.
As persoas que accedan coa Cl@ve eIDAS poderán realizar os trámites de desprazamento de persoas traballadoras no marco dunha prestación de servizo transnacional e os de axudas de emerxencia social.
O sistema Chave 365 da Xunta conta na actualidade con 1,5 millóns de persoas usuarias, unha cifra que non parou de crecer dende a creación do sistema en 2014. Entre 2019 e o pasado mes de maio, o número de persoas usuarias creceu un 767%.