A Xunta destaca o rol das aulas CeMIT para unha transformación dixital inclusiva

mércores, 29 de novembro do 2023 Redacción

O conselleiro de Facenda e Administración Pública, Miguel Corgos, visitou esta mañá a aula CeMit de Moaña, acompañado polo director da AMTEGA, Julián Cerviño, onde destacou o papel fundamental da rede pública de aulas CeMIT para acadar unha transformación dixital inclusiva.
A visita coincidiu co remate dun ciclo formativo básico en intelixencia artificial, que contou con máis de 220 participantes, e é un bo exemplo do compromiso da Xunta para que a cidadanía poida tirar proveito das TIC con independencia da súa idade, formación ou lugar de residencia.
Miguel Corgos lembrou que o Plan de reforma e ampliación da Rede que se está a levar a cabo facilita tanto unha formación máis adaptada ás novas demandas tecnolóxicas como unha actualización das tecnoloxías innovadoras nas aulas, con 1.300 novos dispositivos, entre impresoras 3D, kits de programación e drons.
Así mesmo, subliñou que no primeiro trimestre de 2024 completarase a renovación de todo o equipamento, coa substitución de máis de 1.300 ordenadores, ademais da adquisición de 20 unidades de dispositivos adaptados a persoas con capacidades diversas, 880 tabletas, 840 libros electrónicos e 84 complementos audiovisuais.
Con 94 aulas distribuídas por toda a Comunidade, máis de 113.000 usuarios rexistrados e 500.000 horas de formación planificadas desde a súa posta en marcha en 2011, o conselleiro de Facenda e Administración Pública fixo fincapé no labor da rede CeMIT e a súa contribución a que Galicia crecese naqueles indicadores de dixitalización nos que tiña os niveis máis baixos, como o uso da internet nas franxas de idades máis elevadas.

PUBLICIDADE