A Xunta e Microsoft avanzan no desenvolvemento de iniciativas de IA ética e responsable

O presidente da Xunta de Galicia, Alfonso Rueda, e o presidente de Microsoft España, Paco Salcedo, mantiveron un encontro en Santiago de Compostela para avaliar o impacto da implantación da intelixencia artificial na administración galega e avanzar en novas liñas de colaboración que melloren a eficiencia dos servizos públicos.
A Xunta está a aplicar xa tecnoloxías de IA en sectores como o sanitario, coa finalidade de axilizar o acceso á información médica e apoiar a toma de decisións clínicas, sempre garantindo a privacidade e a seguridade dos datos dos pacientes. Esta iniciativa enmárcase no protocolo de intencións subscrito hai un ano entre o Goberno galego e Microsoft España, que promove o desenvolvemento conxunto de solucións innovadoras para mellorar a produtividade administrativa e a calidade de vida da cidadanía.
Este protocolo súmase a outros acordos previos entre ambas as entidades, como o establecido en materia de ciberseguridade a través do Nodo Galego de Ciberseguridade CIBER.gal, centrado na loita contra as ameazas dixitais e na potenciación das capacidades tecnolóxicas de Galicia. Tamén destaca o convenio para a formación en Intelixencia Artificial de 45.000 mozos desempregados galegos, canalizado a través do Servizo Público de Emprego.
A Xunta e Microsoft reiteraron así o seu compromiso por continuar identificando novas oportunidades de cooperación tecnolóxica e dixital, co obxectivo de consolidar o ecosistema galego de innovación e favorecer a integración da IA tanto nas empresas como nas administracións públicas da comunidade.