A Xunta impulsa un plan de formación especializada sobre violencia dixital

A conselleira de Política Social e Igualdade, Fabiola García, informou que este xoves 16 de abril abre o proceso de consulta pública da futura Lei de medidas integrais contra o acoso e a violencia dixital de Galicia (as alegacións estarán abertas ata o 8 de maio). Entre as principais novidades, destaca a posta en marcha por parte da Xunta dun plan de formación especializada destinado a todos os axentes sociais que participan na atención directa ás vítimas de violencia dixital.
Na súa intervención, a conselleira destacou que Galicia “será pioneira en España e en Europa”, ao dotarse dunha lexislación específica destas características, coa que se queren combater violencias como o ciberacoso ou ciberbullying ou a violencia sexual, que supón o envío non consentido de mensaxes de contido sexual ou a difusión non consentida de material sexual. Unha violencia da que son obxecto, de maneira maioritaria, menores, mulleres e persoas LGTBI.
Entre as principais novidades, Fabiola García salientou “o impulso dun plan de formación especializada sobre violencia dixital para todos os axentes sociais que participan no proceso de atención ás vítimas”. Esta formación irá destinada ao persoal dos Centros de Información á Muller (CIMS), dos Centros de Crise, dos servizos sociais municipais, dos forzas e corpos de seguridade e aos letrados, a través dos colexios oficiais. Unha formación que a conselleira definiu como “moi necesaria, xa que a violencia dixital é un concepto moi amplo que engloba diferentes realidades”.
Outra das novidades que se inclúen no texto é que a Xunta garantirá “en todo momento” a asistencia xurídica gratuíta para todas as vítimas de acoso e violencia dixital (con independencia da súa idade ou xénero), “antes, durante e despois da denuncia”, recalcou.
A norma tamén incluirá a posta en funcionamento dun servizo de borrado da pegada dixital. Esta medida trata de facilitar a eliminación do material dixital accesible en rede que se usou como instrumento de acoso ou violencia dixital, favorecendo a restauración da reputación dixital.
Ademais, prevese a creación dun espazo virtual, onde as vítimas poderán recibir asesoramento gratuíto para previr outros ataques ou supostos de violencia dixital. A finalidade é que as vítimas saiban reaccionar e tomen as medidas necesarias ante o acoso e as violencias que sofren a través dos seus ordenadores, teléfonos móbiles, tabletas ou calquera outro dispositivo.
Así mesmo, a conselleira de Política Social e Igualdade sinalou que se desenvolverán programas psicopedagóxicos de intervención especializada en adicións ás novas tecnoloxías dirixidos a menores e ás súas familias.