A Xunta incentivará o emprego na xuventude a través das TIC e a sustentabilidade
venres, 31 de decembro do 2021
A
Xunta, a través da Consellería de Emprego e Igualdade, vai rematar
o ano mobilizando recursos a prol da empregabilidade xuvenil en
administracións e centros e empresas que desenvolvan a súa
actividade nos eidos da investigación, a tecnoloxía e a innovación.
Farao
a través do plan Emprega Xuventude, cos que busca a contratación
dunhas 1.000 persoas desempregadas menores de 30 anos.
Os
primeiros programas deste plan veñen como dixemos cunha importante
vertente tecnolóxica, tanto a convocatoria Primeira experiencia
profesional nas administracións públicas como o programa
Investigo, cos que a Xunta aspira a que máis de 1.000 mozas e
mozos logren un contrato de doce meses e xornada completa. Ambos
programas fináncianse cos fondos europeos de recuperación.
Os
dous programas forman parte dun plan máis amplo, o Emprega
Xuventude, que o Goberno galego promoverá en 2022 con actuacións
para o emprego dirixidas especificamente ás persoas máis novas e
dotado cun total de 51,8 millóns de euros.
A
primeira liña de traballo inclúe un orzamento de 11,2 millóns de
euros para que a Administración autonómica e as súas entidades
instrumentais formalicen contratos en prácticas con traballadores e
traballadoras menores de 30 anos e desempregados. Trátase de
“brindar aos máis novos unha primeira experiencia laboral, unha
vez teñan completada a súa etapa formativa”.
Neste
marco a Xunta destinará o 20% dos fondos a incentivar a
incorporación a empregos verdes, como os relacionados coa
agricultura, gandería e pesca; coa restauración de ecosistemas ou a
implantación de modelos de explotación animal máis ecolóxicos e
sustentábeis; ou as actividades de incremento da eficiencia do
consumo de enerxía e materias primas. Outro 20% destinarase á liña
de competencias dixitais e a porcentaxe restante a empregos en xeral.
Estímase que o programa podería supor a contratación de ata 524
persoas.
No
caso do segundo programa, Investigo, a Xunta aspira a xerar
emprego xuvenil no eido da investigación, da tecnoloxía e da
innovación. As axudas, cun orzamento de 13,1 millóns de euros,
están abertas a organismos de investigación e difusión de
coñecementos, universidades públicas, centros tecnolóxicos,
parques científicos, entidades públicas e privadas sen ánimo de
lucro e empresas que invistan en investigación e innovación.
Priorizaranse
as ocupacións referidas á sanidade, a transición ecolóxica e a
economía verde, así como as relacionadas con servizos de
dixitalización, análise de datos a gran escala (Big Data)
e proxectos de investigación no ámbito da cultura, as áreas
sociais ou as artes. Calcúlase a empregabilidade dun máximo de 585
mozas e mozos grazas a esta iniciativa.