A Xunta inicia hoxe o acendido dixital da Área Técnica de Domaio
luns, 15 de marzo do 2010
Logo da
conclusión das fases I e II do Plan nacional para o apagado analóxico, que se
desenvolveron entre o pasado 18 de xaneiro e o 1 de febreiro, máis de millón e
medio de galegos e galegas xa ven exclusivamente a Televisión Dixital
Terrestre, o que supón o 56 por cento da poboación galega, pertencente a 203
concellos.
Agora, dentro
da planificación de expansión da TDT en Galicia, a Xunta procederá dende hoxe aos
ceses dos emisores analóxicos denominados As
Neves e Arbo o que suporá a incorporación á TDT do concellos pontevedreses
de Arbo, As Neves, Salvaterra, Ponteareas e Salceda de Caselas, nos que habitan
un total de 48.176 veciños e veciñas, que se poderán beneficiar as vantaxes da
nova sinal de televisión.
Os vindeiros
ceses analóxicos desta Área Técnica de Domaio produciranse o vindeiro día 23 de
marzo, nos emisores Cañiza e Carril. Os concellos que se beneficiarán
do seu paso á TDT serán os de A Cañiza, Covelo e a unha parte de Vilagarcía de
Arousa, o que suporá a incorporación doutros 10.108 habitantes ao novo sistema
de televisión dixital.
O seguinte cese
nesta Área Técnica producirase o día 24 deste mes e afectará aos emisores Meis e Moaña, mentres que os concellos beneficiados serán os de Meis, O
Grove, Cambados, Ribadumia, Portas, Barro, Moraña e, parcialmente, o de Moaña.
É dicir, 45.507 habitantes máis incorporados á TDT.
Polo que se
refire a Área Técnica de O Páramo, en Lugo, hai que sinalar que o vindeiro cese
analóxico producirase o vindeiro 22 de marzo, nos emisores Ribeira de Piquín, Ribeira de Piquín II e Vilalba. Os concellos beneficiados serán os de Ribeira de Piquín,
Vilalba e Pol, sendo un total de 17.999 habitantes máis incorporados ese día á
TDT.
O día seguinte,
23 de marzo, producirase o cese analóxico dos emisores Becerreá, Conforto, Pontenova,
Pontenova II, Vilameá, Sanpaio e Viveiro. Os novos concellos que pasarán a
recibir sinal de TDT serán os de Becerreá, A Pontenova, Viveiro e Ourol,
aportando 34.642 habitantes.
Como resumo, a
Xunta vén de anunciar que esta terceira e última fase do apagado analóxico, que
comezou o pasado día 10, beneficiará a preto de 1.300.000 galegos das
provincias de Lugo e Pontevedra, así como a cinco concellos de A Coruña. Esta
fase finalizará o vindeiro 2 de abril
O Goberno
galego, co obxectivo de dar unha resposta áxil ás posibles dúbidas que poidan
xurdir entre a cidadanía afectada polo apagado analóxico, continúa co servizo
de atención telefónica ao cidadán sobre a TDT, o 012, así como coa plataforma
en liña que funciona as 24 horas do día en Internet: www.tdtgalicia.es.