A Xunta promove a protección do tecido empresarial galego cun novo programa de axudas á ciberseguridade

O Consello da Xunta aprobou unha nova convocatoria de axudas, baixo o nome Empresa Cibersegura 2025, co obxectivo de reforzar a seguridade dixital das empresas galegas. A iniciativa, que conta cun orzamento inicial de 1,5 millóns de euros, está deseñada para apoiar a implantación de solucións técnicas e organizativas fronte a ameazas cibernéticas, a través de entidades especializadas previamente homologadas.
Este programa, impulsado pola Consellería de Economía e Industria a través do IGAPE, busca consolidar a cultura da ciberseguridade no tecido produtivo de Galicia, favorecendo o acceso das empresas a servizos avanzados que incrementen a súa capacidade de prevención, resposta e confianza ante riscos no contorno dixital.
As axudas tramitaranse en réxime de concorrencia non competitiva e permitirán financiar ata o 75 % do custo dos servizos contratados, cun límite de 30.000 euros por empresa. Os pagamentos faranse directamente aos provedores homologados, sen que as empresas teñan que adiantar os custos. Ademais, poderá autorizarse un pagamento a conta de ata o 50 % da subvención.
Entre as accións subvencionables inclúense o diagnóstico da madurez dixital, a análise de riscos de ciberseguridade, a execución de itinerarios técnicos específicos en contornos cloud (IaaS), tecnoloxías da información (ITaaS) e operacións industriais (OTaaS), así como campañas de sensibilización, implantación de estándares de calidade e contratación de servizos estratéxicos.
O procedemento de homologación dos provedores garante a solvencia técnica, a experiencia e a capacidade operativa das entidades participantes, asegurando que as empresas beneficiarias conten cun acompañamento profesional e adaptado ás súas necesidades.
A publicación oficial da convocatoria realizarase nas próximas semanas, e as solicitudes poderán presentarse ata o 15 de novembro de 2025 unha vez se complete o proceso de homologación das entidades colaboradoras.