A Xunta redobra o seu apoio á candidatura da UNESCO de Ponte... nas Ondas!
mércores, 16 de novembro do 2022
Os
directores xerais de Cultura e de Patrimonio Cultural, Anxo M.
Lorenzo e Mª Carmen Martínez, asistiron este mércores 16 de
novembro, no Centro Cultural de Valadares, á entrega de premios da V
edición do certame As imaxes do Patrimonio,
onde trasladaron o apoio da Xunta de Galicia a candidatura de
Ponte... nas Ondas! que aspira a entrar no Rexistro de Boas
Prácticas de Salvagarda do Patrimonio Cultural Inmaterial da UNESCO.
Lorenzo
e Martínez amosaron o seu optimismo ante a decisión que se tomará
no 17 Comité Intergubernamental que se celebrará en Rabat do 28 de
novembro ao 3 de decembro despois de que a proposta conxunta de
Galicia e Portugal superase hai uns días o último informe necesario
previo a súa inscrición. “Para coidar e manter vivo o noso
patrimonio é clave que as xeracións máis novas comprendan a
importancia de coidalo e iniciativas como esta resultan fundamentais
para a súa concienciación”, salientaron, engadindo que “agardamos
que a resposta sexa positiva porque sería a primeira distinción
nesta materia para Galicia e suporía un gran impulso internacional
para favorecer os lazos coa lusofonía e a sensibilización co
patrimonio inmaterial”, afirmaron.
Máis
datos de Ponte... nas ondas
O
proxecto, de máis de 25 anos de andaina, é unha iniciativa
transfronteiriza que promove o intercambio lingüístico entre
centros de ensino da Eurorrexión Galicia-Norte de Portugal e que
opta a ser inscrito no rexistro de boas prácticas do Patrimonio
Cultural Inmaterial da UNESCO.
Trátase
dunha candidatura conxunta de España e Portugal, presentada en marzo
de 2021 e cuxa resolución coñecerase na sesión que o Comité
Intergobernamental celebrará en Rabat do 28 de novembro ao 3 de
decembro.
Ponte...
nas Ondas! vén da man da Asociación Cultural e Pedagóxica do mesmo
nome co apoio da Secretaría Xeral de Política Lingüística
(Consellería de Cultura) e de cuxa colaboración teñen abrollado
iniciativas como o Certame de Podcasts en Galego Xosé Mosquera Pérez
(O Vello dos Contos) ou outras iniciativas que poñen o foco
nas novas ferramentas dixitais.
Oito
galardóns, tres accésits e un premio especial do xurado
O V
Certame de Recolla das Imaxes e Podcasts do Patrimonio Inmaterial
Galego-Portugués, o concurso As imaxes do patrimonio, promove
a recuperación e posta en valor das fotografías para que poidan ser
usadas no ámbito escolar pola carga didáctica que atesouran con
oito galardóns divididos en tres categorías, tres accésits e un
premio especial do xurado.
Na
primeira categoría, para alumnado de Infantil e Primaria, resultaron
gañadores Yoel Ares Gómez, do Colexio da Ramallosa (Teo), no
primeiro posto; o colexio Altamira (Salceda de Caselas), no segundo,
e Joana Correira do Agrupamento de Escolas Vale do Tamel (Barcelos)
no terceiro.
Na
segunda, dirixida a estudantes de Secundaria, Bacharelato e Formación
Profesional, o primeiro premio foi para Amaia Troncoso, do instituto
Pedras Rubias (Salceda de Caselas); o segundo para Irene Briones
Álvarez, do instituto Auga da Laxe (Gondomar), e o terceiro para
María Martins Pires, da Escola Básica Dr. Flávio Gonçalves (Póvoa
de Varzim).
Por
segundo ano consecutivo inclúese unha terceira categoría para
podcasts relacionados coas imaxes do patrimonio na que se recoñeceu
o traballo do colexio CEIP da Ramallosa (Teo), na categoría de
Ensino Primario, e de Cristina Louredo, do instituto Alexandre Bóveda
(Vigo), na categoría de Ensino Secundario.
Os
premiados complétanse con un accésits en cada unha das categorías
que recibiron Elisa de Almeida Mouteira do colexio Altamira (Salceda
de Caselas), Héctor Castelló López do instituto Rosalía de Castro
(Santiago de Compostela) e Carmen Iglesias Fernández do instituto
San Rosendo (Mondoñedo).
Ademais,
o xurado decidiu entregar un premio especial á participación o
colexio Carlos Casares de Alxén (Salvaterra de Miño) polo seu
traballo para fomentar a investigación e coñecemento do patrimonio
entre o alumnado.