A Xunta reforza a formación dos empregados públicos en protección de datos

Un total de 70 empregados públicos participan desde hoxe na cuarta edición do Curso superior en protección de datos, organizado pola Axencia para a Modernización Tecnolóxica de Galicia (AMTEGA) e o Nodo CIBER.gal.
A sesión inaugural contou coa presenza da directora da Escola Galega de Administración Pública (EGAP), Sonia Rodríguez-Campos; do director da AMTEGA, Julián Cerviño Iglesia, e do xefe da subárea de seguridade da Axencia e director da acción formativa, Gustavo Herva Iglesias.
Rodríguez-Campos puxo en valor a ampla acollida desta edición e subliñou que o avance tecnolóxico no eido da Administración pública «ten que ir acompañado dunha clara preocupación pola seguridade como factor decisivo na implantación da Administración electrónica e da sociedade da información». Engadiu tamén que «ante o desenvolvemento da Administración dixital é preciso dotar ao persoal empregado público das ferramentas e os coñecementos necesarios para salvagardar os datos persoais que se almacenan e transmiten en liña, algo esencial para defender os dereitos da cidadanía e preservar a confianza nas nosas institucións».
A directora da EGAP recalcou que entre os obxectivos da Xunta «é mellorar a seguridade para minimizar os posibles incidentes neste eido, garantir a confidencialidade da información e asegurar a continuidade do servizos prestados». Por iso, afirmou que «faise ineludible a convocatoria de actividades formativas que contribúan a crear un escenario de seguridade xurídica». Engadiu ademais que este curso «é unha mostra máis do esforzo e o compromiso por parte da Escola por ofrecer unha formación anual completa, actualizada e de calidade naquelas materias de relevancia para o persoal empregado público mediante cursos e accións formativas en relación co eido dixital».
Pola súa parte, o director da AMTEGA, Julián Cerviño, destacou que «os datos deben usarse para mellorar a calidade de vida das persoas, pero, en todos os casos, teñen que ser xestionados dende a responsabilidade, a seguridade, a garantía de confidencialidade e dende o coñecemento de toda a información normativa e legal». Sinalou igualmente que «o éxito de anteriores edicións e a demanda rexistrada este ano, no que se volveron a completar con creces as 70 prazas, indican que o persoal empregado público de Galicia afronta este reto con esa responsabilidade necesaria».
Na sesión inaugural, Elena Davara e Laura Davara impartiron unha clase maxistral centrada nas claves para cumprir a normativa de protección de datos e o seu impacto nas redes sociais. Tamén interveu Víctor Salgado Seguín cun relatorio sobre protección de datos e intelixencia artificial.
Esta cuarta edición do curso, que se prolongará ata o 10 de decembro e conta cun total de 118 horas de duración, ofrece formación dende unha perspectiva técnico-xurídica e práctica. Trátase dunha actividade de modalidade mixta (presencial, telepresenza e teleformación) que busca concienciar sobre a importancia do dereito fundamental á protección de datos, promover boas prácticas de acordo coa normativa vixente, garantir o respecto aos dereitos das persoas interesadas e preparar ao persoal para a correcta xestión de posibles incidencias.
O programa inclúe contidos como os principios básicos de seguridade, as medidas que deben implantarse nos sistemas de información segundo o Regulamento Xeral de Protección de Datos e o Esquema Nacional de Seguridade, así como unha visión global das funcións e responsabilidades das persoas que manexan datos personais e do labor das autoridades de control.
Entre os temas que se tratarán figuran a responsabilidade da Administración pública no tratamento de datos, os dereitos da cidadanía, o réxime sancionador, a protección de datos en ámbitos como a saúde, os menores ou a propia Xunta, a garantía dos dereitos dixitais, a intelixencia artificial aplicada ás Administracións públicas e a videovixilancia, entre outros.