A Xunta traballará co ITG na creación dun espazo para a investigación en drons na Cidade das TIC
xoves, 25 de novembro do 2021
O
Goberno galego comunicou, a
través do presidente Alberto Núñez Feijóo, a aprobación dun
convenio de colaboración co Instituto Tecnolóxico de Galicia (ITG)
para desenvolver un espazo de investigación na Cidade das TIC da
Coruña (a antiga Fábrica de Armas agora convertida, de xeito
progresivo, nun gran foco de coñecemento e emprendemento tecnolóxico
dixital) que estará destinado á experimentación con drons no
ámbito do transporte de pasaxeiros e mercadorías en zonas urbanas.
Feijóo
informou de que a Xunta achegará algo máis da metade do
investimento previsto, preto de 580.000 euros dos 1,16 M€, para
executar actuacións como: o acondicionamento e reforma dun edificio
da Cidade das TIC, o desenvolvemento dunha rede de seguridade,
adquisición de equipamento específico e licenzas necesarias para
realizar as probas de experimentación. O presidente tamén fixo
saber que este proxecto Galaxy-lab “permitirá reforzar a fortaleza
competitiva do Polo Aeroespacial de Galicia, avanzar no despregamento
do sistema de xestión do tráfico aéreo non tripulado deseñado
pola UE (U-Space), axustar os sistemas de xeoposicionamento e
coordinar un espazo aéreo controlado real”.
Feijóo
salientou a importancia deste sector e do papel de Galicia nel, “toda
vez que o Polo Aeroespacial leva mobilizados 164 M€ de investimento
público-privado, desenvolvéronse 59 proxectos de I+D+i coa
participación de máis de 930 profesionais e coa aceleración de 24
empresas”.