A Zona Franca doa computadores á organización de enxeñeiros IEEE Uvigo para loitar contra a fenda dixital
venres, 16 de abril do 2021
O
Consorcio
da Zona Franca de Vigo, co obxectivo de combater a fenda
socio-dixital en tempos de pandemia (un período de tempo no que se
fixeron máis importantes ca nunca as novas ferramentas), vén de
doar catro ordenadores plenamente operativos á organización de
enxeñeiros IEEE UVigo, quen os fará chegar ás familias que os
necesiten co fin de que facer posíbel, entre outras funcións, que
os seus fillos poidan seguir as clases a distancia e teleformación.
Os
equipos informáticos, que foran desbotados para o traballo diario do
persoal do Consorcio (aínda que se atopan en perfectas condicións
de uso, segundo fixo saber a Zona Franca), foron entregados polo
delegado do Estado, David Regades, e recolleitos por José Antonio
González Nóvoa, Mateo González Cid e Andrés López-Guerra
González.
David
Regades que agradeceu o traballo desta organización, asegurou que “a
loita contra a fenda dixital debe ser un obxectivo de todos e en
especial das administracións públicas. Hoxe doamos este catro
equipos pero en canto teñamos máis dispoñíbeis tamén serán
entregados”.
IEEE
UVigo Student Branch é unha asociación de estudantes de todas as
enxeñarías da Universidade de Vigo que busca implementar a súa
aprendizaxe en todo tipo de proxectos. O grupo iniciou a súa
actividade hai catro anos e nos últimos meses puxeron en marcha unha
iniciativa para recoller computadores da man da ONG Accem. En apenas
un par de semanas xa conseguiron sete equipos completos, así como
unha gran variedade de periféricos como ratos ou teclados, aos cales
se lles dará unha segunda vida mediante o emprego de software libre.
Na súa páxina web
teñen un espazo para todas as empresas ou institucións que queiran
achegar solidariamente este tipo de material e que Accem entregará a
familias que os necesitan.
O
Instituto de Enxeñeiros Eléctricos e Electrónicos é unha
asociación mundial de enxeñeiros dedicada ao desenvolvemento en
áreas técnicas. Presente en 160 países, é a maior asociación
internacional sen ánimo de lucro formada por profesionais das novas
tecnoloxías. O propósito principal de IEEE é fomentar a innovación
tecnolóxica e a excelencia en beneficio da humanidade.