A Zona Franca impulsa dende Galicia o certame europeo de navegación por satélite
venres, 14 de xuño do 2019
A
Zona Franca de Vigo é o socio galego (por quinto ano consecutivo e
en colaboración coa UVigo e a Fundación CINAE) do Concurso Europeo
de Navegación por Satélite (Galileo
Masters). Segundo informa a entidade viguesa, até o vindeiro 31
de xullo as ideas para o desenvolvemento de aplicacións que queiran
optar a converterse nunha realidade empresarial co apoio da Axencia
Espacial Europea poden aínda inscribirse no certame.
Este
ano os premios sumarán máis dun millón de euros. Ademais, os
galardóns inclúen acceso a incubadoras de empresas, formación para
emprendedores, consultoría de patentes, apoio á realización de
estudos de mercado, respaldo técnico, apoio á comercialización e
acceso a expertos e financiamento público, entre outros.
Segundo
explica o delegado da Zona Franca, David Regades, a entidade viguesa
dotará ao gañador de Galicia cun ano de incubación nun dos seus
viveiros, o que inclúe a asistencia no desenvolvemento do produto,
acceso a expertos, consultoría, avaliación e formación e
orientación económica, “porque queremos que para converter a súa
idea en negocio dispoña de todos os mellores servizos”, explicou.
Así mesmo, a Zona Franca sufragará os gastos de viaxe e aloxamento
do gañador para que poida asistir á cerimonia internacional de
entrega de premio, cuxo lugar e data están aínda por determinar.
Este
concurso, promovido pola Axencia Europea GNSS, a Axencia Espacial
Europea, o Centro Aeroespacial Alemán e o Ministerio Federal Alemán
de Transporte e Infraestruturas Dixitais, é un certame internacional
de innovación que premia as mellores ideas no desenvolvemento de
aplicacións orientadas ao mercado e baseadas en tecnoloxías de
navegación por satélite. A Zona Franca lembra que desde o seu
inicio en 2004 a ESNC medrou até converterse nunha rede mundial de
innovación e coñecemento con 18 rexións asociadas e máis de 200
expertos industriais e científicos de todo o mundo.
A
novidade da edición de 2019 é un reto no cal se buscan solucións
por medio de datos procedentes da observación terrestre combinados
con datos xeorreferenciados Galileo/EGNOS.