A aplicación de busca de Google para iOS xa entende o galego falado

martes, 30 de outubro do 2012 Marcus Fernández

JPEG - 139.4 KB
A aplicación de Google entende o galego falado

Google renovou hoxe a súa aplicación de busca para iPhone, iPod Touch e iPad, que facilita o uso das aplicacións en liña de Google dende os trebellos de Apple e que destaca especialmente por permitir introducir as nosas consultas mediante voz, o que ao igual que acontece co widget de busca de Google para Android, tamén pode configurarse agora en galego, de xeito que xa podemos lanzar buscas na web empregando a nosa fala.
A aplicación tamén mellora a súa velocidade de xeito que é máis áxil que realizar as consultas dende un navegador web, permite buscar imaxes a pantalla completa, descarta páxinas web para volver aos resultados de busca, busca nunha páxina web co buscador de texto integrado e tamén permite recoñecer imaxes mediante Google Goggles.
Cómpre lembrar que este tipo de buscas por voz de Google son bastante anteriores ao popular Siri de Apple, e tamén permite realizar certas consultas en linguaxe natural, de xeito que é capaz de facilitarnos resultados deportivos, información da carteleira cinematográfica local e outros datos integrados no gráfico de coñecemento de Google.

JPEG - 59.1 KB
O galego xa figura entre as linguas dispoñibles na aplicación de Google para iOS


Exemplos de uso da aplicación de Google para iOS

PUBLICIDADE