A arquitectura de seguridade na nube de Netskope, máis preto das empresas galegas da man de Plexus
martes, 11 de xaneiro do 2022
A
arquitectura SASE (Secure Access Service Edge), tecnoloxía
baseada na nube que ofrece servizos de rede e seguridade destinados a
protexer a usuarios, aplicacións e datos (blindándoos e
achegándolles funcionalidades de rede e seguridade precisas malia
non estar aloxados nin operar en redes corporativas), estará máis
preto das empresas galegas. O motivo? A formalización de Netskope,
líder da arquitectura SASE, como integrante da familia de
partners da empresa compostelá Plexus Tech.
“A
transformación dixital é un proceso imparábel e en Plexus Tech
buscamos para os nosos clientes o equilibrio entre velocidade e
protección das infraestruturas de comunicación, unha visión
compartida con Netskope”, explican dende a firma galega, engadindo
que con “esta colaboración complétase o catálogo de solucións
de seguridade adaptándonos á realidade actual na que lla seguridade
das redes na nube é fundamental”.
En
concreto, explican, a tecnoloxía de Netskope permitirá ás empresas
e entidades adoptar estratexias de seguridade na nube centradas nos
datos facendo seguimento deles alá onde vaian, integrando estas
estratexias no seu ecosistema tecnolóxico e dixital. En definitiva,
os usuarios estarán en disposición de reforzar a seguridade desde
calquera lugar, dispositivo e aplicación onde se atopen os
traballadores e a información.
Plexus lembra que Netskope
utiliza unha das redes de seguridade máis grandes e rápidas do
mundo, obtendo como resultado unha seguridade rápida, flexíbel e
con ampla capacidade de adaptación. Permite integrar de forma nativa
varios servizos como CASB (Cloud Access Security Broker),
Cloud Firewall ou Secure Web Gateway (SWG) de nova
xeración e acceso privado para ZTNA nunha única plataforma.