A base de datos de persoeiros galegos do CCG engade a entrada de Urbano Feijóo
xoves, 1 de setembro do 2022
O
Álbum de Galicia, a base de datos online do
Consello da Cultura Galega na que se recolle a historia da nosa terra
a través de biografías destacadas, recibiu nesta recta final do
verán unha nova e relevante incorporación: a de Urbano
Feijóo Sotomayor (1808-1898), empresario e político galego que
promoveu a creación dun plan de colonización que facilitase, en
termos xurídicos, económicos, filantrópicos e prácticos a chegada
a Cuba de galegos. O operativo rematou cun grande escándalo polo
trato denigrante dispensado aos traballadores.
O
Álbum de Galicia vén de incorporar a súa biografía asinada
pola escritora Elisa Vázquez de Gey, gran coñecedora da súa figura
e da vida cotiá e política da vida colonial da illa de Cuba.
O
empresario Urbano Feijóo Sotomayor naceu en Coles e morreu en Viana
do Bolo. Fixo carreira política, xa que foi deputado no Congreso por
Ourense e polo distrito de Matanzas en Cuba. Na súa entrada do Álbum
inclúe tamén ligazóns a documentos relevantes que axudan a coñecer
a súa figura.
Álbum
de Galicia
En xaneiro de 2020 o CCG presentou o Álbum
de Galicia, unha colección dixital de biografías de persoas
que destacaron en diversos ámbitos: desde a sociedade, a ciencia, a
cultura ou a empresa. A idea foi “dar visibilidade e perspectiva de
conxunto ás numerosas mulleres e homes, xa finados, que contribuíron
de maneira significativa á sociedade galega ao longo da súa
Historia. En moitos casos, seguen a ser grandes descoñecidos para o
público de todas as idades, de dentro e de fóra do país”, en
palabras do CCG.
As biografías do Álbum de Galicia
están enriquecidas con material documental, referencias
bibliográficas e contidos multimedia que permiten coñecer a obra
das persoas divulgadas, pero tamén a produción intelectual
existente sobre elas.
Ademais, permite explorar a presenza das
persoas biografadas nos fondos documentais dixitalizados do Consello
da Cultura Galega.
O Álbum de Galicia é o resultado
da unificación das coleccións biográficas temáticas do CCG, que
desde o ano 2005 teñen publicado álbums ao redor da muller, a
ciencia ou a emigración, entre outros.