A batería externa Mugenizer N11 permite cargar dispositivos sen fíos

O feito de que boa parte dos smartphones actuais non teñan baterías intercambiables fai que as baterías externas cobrasen importancia nos últimos anos, permitindo así que os usuarios poidan cargar o seu móbil sen ter que ter unha toma de corrente a man e poidan viaxar tranquilos sen o medo de quedar sen batería, e agora o fabricante chinés Mugen Power está a levar un paso máis adiante este tipo de solucións e pon á venda novos dispositivos deste tipo que integran sistema de carga sen fíos (co estándar Qi) que chegarán ao mercado a partir do 8 de novembro.
Unha destas baterías externas que podemos destacar é a Mugenizer N11, que ten unha capacidade de 4.800 mAh (suficiente para achegar un par de cargas completas á meirande parte dos smartphones actuais) que véndese por un prezo de 53,02 euros (con gastos de envío incluídos) e que pode cargarse por microUSB. O dispositivo ten luces para indicar o seu nivel de carga e para cargar outros trebellos permite tanto o uso dunha saída USB estándar (á que incluso poderiamos conectar o cable dun iPhone) como a colocación sobre a súa superficie dun móbil que soporte carga sen fíos (como un Nokia Lumia 920 ou un Nexus 4) para un cómodo uso, tanto no escritorio como incluso durante o transporte, podendo librar de cables a experiencia de carga.
Mugen Power tamén porá á venda o Mugenizer N13 (con batería de 4.000 mAh e un formato máis cadrado) por 48,47 euros e toda unha serie de cargadores sen fíos con distintas formas e tamaños (pero sen batería integrada).