A busca do amor a través da Internet volve á Galega o vindeiro martes

O pasado verán a Televisión de Galicia emitiu a primeira tempada de Amor na Rede, un traballo de Adivina Producciones no que trasladábase a experiencia da plataforma en liña compostelá Twin Shoes á pequena pantalla, de xeito que podiamos ver como a Internet facilitaba o contacto de persoas con perfís que puidesen facilitar a súa transformación en parellas estables; e agora anuncian o regreso deste orixinal formato televisivo, de xeito que a partires do martes 5 de xullo ás 23:20 horas poderemos ver a segunda tempada desta produción audiovisual.
Dende Amor na Rede queren facilitar a busca do amor nuns tempos actuais nos que as redes sociais, as aplicacións móbiles e a inmediatez fan que cada día a xente destine menos tempo para buscar a súa parella ideal e, aínda que non se comprometen ao éxito, cando menos garanten momentos únicos e irrepetibles.
A segunda tempada de Amor na Rede comezará con Manolo, un deportista de 61 anos e moita picardía que chega dende Tui para atopar unha muller que sexa quen de seguirlle o ritmo, para o que contará coa axuda de Itziar Villar, fundadora de Twin Shoes, e psicóloga experta en temas amorosos, así como dos consellos de Camilo, un dos protagonistas da primeira tempada deste espazo televisivo.
A pretendente de Manolo será Lola, unha muller de 55 anos do Grove, que tras varios fracasos amorosos e unha grande inseguridade buscará tender pontes ao amor, de xeito que tras varios cuestionarios, probas e citas poderemos ver se chega a bo porto este proxecto de parella.
Amor na Rede emitirase os martes de verán ás 23:20 horas, e aínda non remataron de gravar esta tempada, polo que se algunha moza de entre 20 e 30 anos está interesada en participar, a organización do programa xa a convidan a sumarse á busca do amor nun dos últimos episodios do programa.