A ciberserguridade galega loce casos de éxito en Madrid
xoves, 28 de novembro do 2019
O
pasado xoves 21 de novembro celebrouse en Madrid o evento Tech4Secur,
o Congreso Internacional de Tecnoloxías para a Seguridade e as
Emerxencias, impulsado pola consultora galega Ferreira Dapía
Technology Consultant, con sede principal na Coruña. A cita contou
cun centenar de asistentes, entre eles, corpos de seguridade do
Estado, empresas de seguridade, profesionais das emerxencias,
investigadores e desenvolvedores tecnolóxicos, cargos públicos,
etc.
Tratábase
da primeira edición dun congreso que acolleu 16 relatorios de alto
nivel, 15 empresas participantes como expositoras, 6 empresas
colaboradoras (asociacións e medios especializados), e dúas
patrocinadoras (a viguesa Radiospectrum e Proyecto Salvavidas). O
evento foi unha oportunidade inmellorábel para obter información
actual e de utilidade sobre as tecnoloxías que serven para coordinar
aos equipos de seguridade, previr incidentes en eventos masivos,
salvar vidas e garantir a protección pública.
Entre
os organismos participantes cómpre salientar a presenza do Centro
Criptolóxico Nacional (anexionado ao CNI), a Axencia Espacial
Europea, a Subdirección Xeral de Sistemas Terrestres do Ministerio
de Defensa, a Dirección de Seguridade Cidadá do Concello da Coruña
ou Madrid Destino.
Entre
as empresas privadas luciron achados e experiencias de éxito as
seguintes compañías, moitas delas galegas: Radiospectrum, Proyecto
Salvavidas, Genasys, Imatia, Situm, Sistelec, Sygic, Teltronic ou
Sateliun.
O
congreso foi conducido por Pedro Gómez, produtor e director do
programa Protegidos Radio e experto en seguridade pública e privada.
Mentres que o encargado de abrir o acto foi Manfredo Monforte Moreno,
xeneral de división do Instituto Nacional de Técnica Aeroespacial.
Javier
Candau, xefe do Departamento de Ciberseguridade do Centro
Criptolóxico Nacional declarou no congreso que “España é o país
do mundo que mellor xestiona a ciberseguridade” e salientou a
importancia das medidas de prevención: “Gustaríanos ser moito
máis proactivos, pero moitas veces actuamos só cando nos chaman
porque xorde un problema”.
Raúl
Valera Tena, director de Seguridade e Emerxencias de Madrid Destino,
centrouse no “desaxuste existente” entre a nova normativa, que
regula a seguridade en eventos públicos, e a falta de técnicos
especializados nesta materia. “A clave é a formación”, dixo,
engadindo que unha das maiores innovacións neste eido é a
tecnoloxía SARF porque “permite controlar, intervir e potenciar as
comunicacións no que sería un evento como a cabalgata dos Reis
Magos en Madrid”.
As
tecnoloxías de prevención contra abusos sexuais ocuparon tamén un
lugar destacado nesta primeira edición do evento. Así, Anna
Almécija Casanova, avogada e criminóloga, declarou que para
desenvolver tecnoloxías primeiro hai que falar coas vítimas: “Non
podo crear unha app para a violencia de xénero se
nunca falei cunha vítima de violencia de xénero”.
Houbo
tamén lugar para falar da importancia que terá o Sistema Galileo en
relación coa comunicación e a seguridade. Para iso, Javier
Ventura-Traveset, director da Oficina Científica Galileo, Axencia
Espacial Europea, salientou que Galileo xa entrou no mercado e fíxoo
pola porta grande: “Agora o 95% dos chips inclúen Galileo, isto é
un éxito, con mil millóns de usuarios en só 34 meses”.
Carlos
García Touriñán, director de Seguridade e Emerxencias do Concello
da Coruña, enxalzou a importancia das tecnoloxías para a seguridade
na súa cidade: “Apostamos desde hai anos por incorporar novas
ferramentas que nos permiten mellorar a seguridade cidadá, o que nos
axudou a reducir e a previr os incidentes en grandes eventos, como
aconteceu no dispositivo da noite de San Xoan”.
Entrega
de premios
A
xornada concluíu coa entrega de premios, en tres categorías
respectivamente, a unha empresa privada, a un organismo público e ao
mellor proxecto tecnolóxico innovador. Recaeron sobre a empresa
Radiospectrum por “ofrecer un dispositivo tecnolóxico con
capacidade para cubrir as necesidades do San Xoan na Coruña”;
Carlos García Touriñán e o Concello da Coruña, pola “coordinación
dos máis de 500 operativos despregados durante esa noite”; e a
empresa galega Imatia Innovation, por “crear unha ferramenta que
serve para garantir a seguridade no sector marítimo mediante o uso
de vehículos aéreos e mariños non tripulados e opcionalmente
tripulados”.