A cidadanía de Narón poderá formarse este mes en deseño gráfico con Canva

A aula Cemit de Xuvia (Narón) acollerá un novo curso de Deseño gráfico con Canva. A concelleira de Formación e Novas Tecnoloxías, Natalia Hermida, informou da apertura, este luns 3 de xaneiro, do prazo de inscrición desta acción formativa, indicando que se poden anotar as persoas interesadas a través da web da Rede CeMIT. En total hai nove prazas que se cubrirán por orde de inscrición, tal e como se indica dende a citada plataforma.
O curso impartirase do 10 ao 19 de xaneiro (32 horas en total), nas instalacións da aula Cemit de Xuvia, en horario de 16.00 a 20.00. Edición de fotos con Canva, creación dun libro virtual, dun deseño con formato personalizado, creación de logotipos, infografías, menús para restaurantes e cafeterías, cabeceiras para Youtube, miniaturas, pósters, publicacións para redes sociais e tarxetas profesionais forman parte dos contidos que se abordarán na convocatoria.
A edil naronesa animou á cidadanía a inscribirse nesta convocatoria para incrementar os seus coñecementos en deseño gráfico a través do programa Canva, que ofrece múltiples posibilidades.