A comarca de Ferrol achega ás mulleres formación en reparación de móbiles e xestión de comunidades virtuais

mércores, 9 de agosto do 2023 S. P.

O Programa Integrado de Emprego (PIE) da Mancomunidade de Concellos da Comarca de Ferrol achegou un novo prazo de inscrición para a súa formación dirixida a mulleres desempregadas dos municipios da bisbarra. En concreto, quedan vacantes para os para os itinerarios de Cociña (Cociña colectiva e Cociña vexetariana), Reparación de teléfonos móbiles e Agricultura ecolóxica. Poden inscribirse mulleres dos seguintes concellos: Ares, Cabanas, Cedeira, Fene, Mugardos, Narón, Neda e Valdoviño.
Así mesmo, aínda que se iniciou hai uns días, aínda é posible anotarse na especialidade de Xestión de comunidades virtuais, do itinerario de Community Management. Á parte da formación sinalada, o Programa Integrado de Emprego da Mancomunidade de Concellos da Comarca de Ferrol ofrece a posibilidade de realizar outras accións formativas que axuden ás usuarias a aumentar a súa empregabilidade: obradoiros de técnicas de busca de emprego, manipulación de alimentos, alfabetización informática e Internet, conversa en inglés, redes sociais e dispositivos dixitais, ferramentas de adestramento (coaching), entrevistas de selección de persoal e habelencias sociais.
As inscricións poden tramitarse a través dos números de teléfono 613 108 530 ou 613 108 535 e tamén do correo electrónico piemancomunidade@ferrol.es. As participantes recibirán unha bolsa consistente en 7 euros por día de asistencia ás accións formativas do programa e contarán con medidas favorecedoras da conciliación no caso de ser preciso.
O obxectivo do Programa Integrado de Emprego da Mancomunidade de Concellos da Comarca de Ferrol 2022/2023 é “achegar ferramentas ás participantes de xeito que melloren a súa empregabilidade e logren a inserción laboral”. Entre os obxectivos cuantitativos está o de acadar un mínimo do 35% de inserción laboral das persoas participantes, feito para o que se combinan as diferentes accións formativas.

PUBLICIDADE