A compostelá Tesla Technologies estará presente na IBC 2025

Esteban Vázquez, director xeral de Tesla Technologies, presentando o proxecto o pasado mes de febreiro

A empresa compostelá Tesla Technologies participará do 12 ao 15 de setembro na International Broadcasting Convention 2025, a feira mundial de referencia en tecnoloxía, medios e entretemento que se celebra no centro de congresos RAI de Ámsterdam. A compañía galega forma parte do proxecto Changing the game… Again, unha iniciativa chamada a revolucionar a personalización de contidos no ámbito da radiodifusión.
A proposta, seleccionada como Proxecto Incubadora Especial 2025, permitirá que os espectadores deportivos accedan a unha experiencia hiperpersonalizada, converténdose en parte activa do encontro. Grazas á tecnoloxía de intelixencia artificial desenvolvida por Tesla Technologies en colaboración con Xansr Media, será posible analizar en tempo real un partido e xerar resumos personalizados, momentos destacados ou datos instantáneos adaptados a cada usuario. O sistema perfila as preferencias do espectador, recoñecendo desde o equipo favorito ata xogadores concretos, e permite formular preguntas directas á IA, como quen foi o mellor xogador dos últimos dez minutos ou cales foron as xogadas máis relevantes.
Segundo explicou o director xeral da empresa, Esteban Vázquez, «non estamos simplemente engadindo unha capa de personalización: estamos entregando o control da narrativa ao espectador». A solución ofrece, ademais, interacción multilingüe en tempo real, accesibilidade para persoas con discapacidade visual e compatibilidade con múltiples formatos de emisión.
Tesla Technologies asumiu un papel clave na integración de sistemas, garantindo a fusión fluída de transmisións en directo, ángulos dinámicos de cámara e elementos gráficos interactivos. Tamén desenvolveu a interface do asistente virtual Aiko, pensada para que a interacción cos usuarios sexa sinxela e atractiva.
O proxecto no que participa Tesla será presentado oficialmente o 14 de setembro na IBC, nun acto no que intervirán representantes de Verizon Business, BFBS, AMD e Xansr Media, entre outros. O evento, que este ano reúne 14 pavillóns con innovacións punteiras, serve de escaparate global para compañías que buscan visibilidade ante firmas como Disney, Netflix, Amazon, Apple, YouTube ou Microsoft.