A comunidade de ASPANAS prepara este ano os kits científicos da feira Galiciencia
mércores, 5 de maio do 2021
ASPANAS,
a asociación de pais e nais a favor das persoas con discapacidade
intelectual de Ourense, está a colaborar co Parque Tecnolóxico de
Galicia (Tecnópole) na preparación dos kits con material científico
que recibirán as rapazas e rapaces participantes en Galiciencia,
a maior feira científico-tecnolóxico da nosa terra e unha das máis
sobranceiras do ámbito estatal.
Segundo
fixo saber a Tecnópole (organizadora de Galiciencia dende 2006), uns
40 usuarios do centro ocupacional de ASPANAS encargaranse de montar
500 equipos e 210 caixas con merchandising da feira, que, como
lembraremos, este ano celébrase en formato online (novamente)
por mor da delicada situación sanitaria que estamos a vivir.
Tal
como indica Belén González, coordinadora do centro ocupacional de
ASPANAS, “ao redor de 40 usuarios do centro realizarán, a través
de tres talleres diferentes, un traballo en cadea que nos permita ter
os kits e as caixas montadas no menor tempo posíbel”. Engade que
“este material ten a súa complicación porque, por exemplo, hai
que meter en bolsiñas independentes 50 gramos de po, e ten que ser
esa cantidade exacta”.
Desde
ASPANAS salientan que “este tipo de colaboracións son vitais para
os nosos usuarios, é fundamental para eles estar ocupados, ter unha
actividade cun principio e un fin, que se sintan útiles e produtivos
ao final do día, e se sintan ben con eles mesmos. Están moi
ilusionados con esta tarefa e moi agradecidos”.
Que
é Galiciencia?
Diríxese
a estudantes de Primaria, Secundaria, FP e Bacharelato. Conta co
apoio da Xunta de Galicia, a través da Axencia Galega de Innovación
(GAIN); e coa colaboración da Fundación Española para a Ciencia e
a Tecnoloxía (FECYT) – Ministerio de Ciencia e Innovación.
Esta
16ª edición celebrarase os días 26, 27 e 28 de maio, coa temática
A innovación Pos-COVID a través da revolución do talento.
Por
segundo ano consecutivo, será online debido á actual
situación sanitaria.
Ademais
do concurso de proxectos, durante a feira celébranse unha serie de
obradoiros. Co fin de que o alumnado participante poida desenvolver
as diferentes actividades programadas nos mesmos, os centros
educativos recibirán un kit con materiais científicos.