A data de lanzamento e o prezo da Steam Machine continúan sen definir

O pasado mes de novembro Valve presentou unha serie de hardware que estaba previsto que chegase ao mercado a primeiros de 2026, pero as grandes incógnitas sobre estes produtos, como a data de lanzamento e o prezo seguen sobre a mesa, e a compañía de Gabe Newell saíu á palestra para recoñecer que están a ter problemas por mor da escaseza de memoria e almacenamento, compoñentes que están a ter unha elevada demanda por mor do pulo que está a ter a IA.
Os prezos da memoria RAM e do almacenamento NVMe están disparados, e iso fai que teñan que revisar o calendario de lanzamentos e a política de prezos, aínda que aseguran que continúan coa intención de que os novos produtos vexa a luz na primeira metade do ano.
Pero a falla de concreción na data e no prezo dos produtos non deterá a comunicación de información sobre os mesmos e, por exemplo, agora detallan que na Steam Machine a meirande parte dos xogos que actualmente hai en Steam «funcionan moi ben en 4K a 60 FPS con FSR», aínda que nalgúns títulos recomendan empregar unha velocidade de fotogramas inferior con VRR para poder manter unha resolución interna de 1080p. Aseguran estar a investigar melloras do escalado e a optimizar o trazado de raios.
Outro detalle interesante é a confirmación de que tanto a memoria RAM (DDR5 SODIMM) como o almacenamento SSD (NVMe 2230/2280) da Steam Machine serán actualizables por parte do usuario.