A directora da AMTEGA dá conta dos obxectivos en banda larga ultrarrápida para Galicia

O Plan de Banda Larga da Xunta volve subir un novo chanzo. O obxectivo deste no impulso é dotar de acceso a Internet a través de redes ultrarrápidas ao máis de 74.000 galegos de 181 concellos. Esta nova actuación, debullada hoxe nos seus detalles pola titular da axencia autonómica AMTEGA, Mar Pereira, abrangue unha liña de axudas de 14,2 millóns de euros, co-financiados co Fondo Europeo Agrícola de Desenvolvemento Rural (FEADER), a Telefónica de España. O operador resultou beneficiario da convocatoria de axudas, en réxime de concorrencia competitiva, lanzada pola axencia AMTEGA en xaneiro no marco do Plan de Banda Larga de Galicia 2020.
Segundo sinalou Mar Pereira, con este investimento (que cubre o 90% dos custes dos despregues) a operadora de telecomunicacións facilitará o acceso a redes de 100 Mbps a través de fibra óptica a 74.400 veciños de 181 concellos das catro provincias galegas no prazo de dous anos. Esta actuación céntrase en núcleos de menos de 300 habitantes e, segundo indica AMTEGA, complementa á que ten en marcha o Estado, que beneficiará a outros 258.000 galegos de núcleos de maior tamaño, grazas a un investimento público de 21 millóns de euros de Fondos FEDER.
Ademais, o Estado anunciaba eses día a posta en marcha do Plan 300x100 para estender fibra óptica ao 100% dos núcleos de poboación en 2021 cun investimento de 525 millóns de para o período 2018-2021.
En termos concretos, as actuacións en marcha da Xunta e o Estado diríxense a achegar a seguinte realidade: que no 2020 máis de 332.000 galegos que hoxe viven nas zonas brancas de 258 concellos, teñan acceso a redes ultrarrápidas. “Así, en dous anos, máis do 74% do galegos poderán acceder a internet de alta velocidade”, explican fontes de AMTEGA, engadindo que “esta porcentaxe incrementaranse con novas convocatorias anunciadas polo Estado. O Consello de Ministros do día 23 de marzo aprobou axudas para 2018 cun importe de 150 millóns de euros para toda España.
A subvención aprobada é a terceira liña de actuación do Plan de Banda Larga da Xunta, que se suma á de polígonos e á de axudas á empresas illadas do rural.
En colaboración con R, beneficiario doutra liña de axudas de 3,4 millóns de euros co-financiados con FEDER, a Xunta completará este ano a conexión de 81 polígonos industriais a redes de ata 350 Mbps, que sumados aos que xa contan con redes ultrarrápidas serán un total de 130 superficies empresariais.
Por outra banda, máis de 30 empresas de zonas illadas das catro provincias puideron conectarse a rede de entre 50 e 350 Mbps grazas á outra liña de axudas do Plan con case 400.000 euros tamén co-financiados con FEADER.
Cómpre lembrar tamén que, en colaboración co Estado, estase a desenvolver a iniciativa Escolas Conectadas, cuxo adxudicatario Orange, está a completar os traballos para dotar a máis de 800 centros educativos públicos con redes de máis de 100 Mbps. Unha vez rematada esta actuación, nos vindeiros meses, o 100% dos centros públicos de primaria e secundaria terán acceso a redes ultrarrápidas.