A edición 2016 de INCUVI-Emprende distingue unha ducia de proxectos innovadores

Este xoves deuse a coñecer a ducia de iniciativas vencedoras da edición 2016 dos premios INCUVI-Emprende e máis as dúas seleccionadas na primeira edición dos INCUVI-Avanza, unha convocatoria para o afianzamento dos proxectos recoñecidos en entregas previas. Segundo fixo saber a Universidade de Vigo na entrega de distincións (facendo reconto), ao longo das cinco edicións anteriores dos premios presentáronse 150 propostas e 47 delas convertéronse en startups “de alto valor innovador nos tres campus”. No acto, o reitor Salustiano Mato salientou o potencial da Universidade de Vigo como unha institución académica ateigada de dinamismo e que é quen de axudar a converter en realidade “cousas que poden parecer soños pero que cada día constatamos que son realidade”. Esta é, dixo, a finalidade de INCUVI e, tamén, dos seus galardóns: ser unha fábrica de emprendedoras/es.
Segundo lembrou, na edición 2016 seleccionáronse 18 finalistas, dos que foron elixidos seis proxectos gañadores do Campus de Vigo, catro de Ourense e dous de Pontevedra. Os seus responsábeis, agora, madurarán cadanseus proxectos dende espazos de pre-incubación das sedes INCUVI de Ourense, na Tecnópole; de Pontevedra en AJE; e de Vigo en Cidade Universitaria.
A vicerreitora de Estudantes, Dolores González, foi a encargada de dar a coñecer os gañadores e lembrou que xa na pasada edición acadouse “un dos nosos meirandes fitos: a globalización académica e xeográfica de INCUVI-Emprende, chegando así a todas as áreas de coñecemento e a tódolos centros e titulacións da Universidade de Vigo”.
Campus de Vigo
Indo aos premiados e ás súas propostas, un dos emprendedores recoñecidos foi Alberto Novoa, graduado en Enxeñaría de Tecnoloxías de Telecomunicación, que recolleu o galardón por MyKeeper, unha iniciativa que mediante unha pulseira de xeolocalización e un elemento detector de actividade desenvolve un sistema de vixilancia para enfermos de Alzheimer e doutras patoloxías semellantes.
Outro dos proxectos distinguidos é Macromicologic, unha iniciativa que vai ter o seu centro de operacións na preincubadora da Cidade Universitaria e que se dirixe a achegar servizos relacionados coa micoloxía tales como a avaliación da produción, catalogación de especies, valoración económica do produto, implantación de novas especies, creación de roteiros micoturísticos. Vén da man de Hugo Fernández, graduado en Bioloxía.
Xunto a Mykeeper e Macromicologic, foron premiados tamén os responsábeis das outro catro ideas empresariais con destino vigués: Loop Tronic, centrada na Internet das Cousas; Beleader, unha solución web orientada ao turismo de baixo custe; Blue Lion, relacionada do mundo da moda e do lecer, e Awesome Soft, enfocada ao desenvolvemento e venda en liña de software de lecer.
Campus de Ourense
Rita Carreira recolleu o premio á cooperativa de iniciativa social Brigantia, un espazo onde crear e desenvolver programas e actividades que promovan a igualdade e o respecto polo medio ambiente, avivar un ocio e tempo libre saudábel “fóra do consumismo,” e onde promover e fomentar “a lingua e a cultura galega”.
Tamén en Ourense terá o seu emprazamento unha empresa de compra-venta de produtos galegos “aínda sen bautizar”, subliñou Sergio Martínez, que explicou que levan xa varios meses traballando nun proxecto comercial enfocado á distribución e comercialización de produtos agrarios de calidade. A estas iniciativas únense, para compartir espazo na Tecnópole, o proxecto Barbook, unha aplicación social enfocada ao sector servizos, e Enviroverde, dirixida á creación de alternativas reais ao uso masivo de fertilizantes inorgánicos.
Campus de Pontevedra
Na cidade do Lérez o destino destas novas ideas empresariais son os espazos de AJE-Pontevedra, onde se instalarán os impulsores de FreeBee e Lag. “A idea de FreeBee nace para axudar a solucionar a problemática que estamos tendo no sur de Galicia coa vespa velutina, a coñecida vespa asiática”, explicou un dos impulsores da iniciativa, que fixo fincapé en que este proxecto propón o desenvolvemento empresarial dun sistema para a xestión, control e erradicación deste especie na contorna galega.
No caso de Lag, impulsada por dúas graduadas en Belas Artes, o que se propón é unha tenda obradoiro de serigrafía, na que ao alumno-cliente se lle permita a creación e personalización das súas adquisicións.
Afianzamento de Meigalabs e Robotilab
A (primeira) convocatoria INCUVI-Avanza, que responde á necesidade de continuar apoiando proxectos que tralo seu paso pola preincubadora amosaron a súa viabilidade pero están aínda en fase de desenvolvemento, seleccionou dúas startups que resultaron gañadoras na edición 2015: Meigalabs, do Campus de Ourense e Robotilab, de Vigo, que seguirán desenvolvéndose no CITI de Ourense ou no Parque Empresarial de Porto do Molle.
A primeira delas conta xa con máis de 500.000 descargas en todo o mundo do seu videoxogo Corrupt Mayor Clicker. A súa aposta empresarial céntrase no desenvolvemento especializado en servizos de gamificación, apps e videoxogos para plataformas móbiles. A segunda céntrase na robótica educativa e a tecnoloxía entendidos como o medio para que os máis cativos aprendan a resolver problemas de todo tipo.