A empresa rianxeira Autoxuga presentará no GaiásTech o seu software para aforrar combustíbel

O vindeiro 23 de marzo a firma Autoxuga, empresa rianxeira de tecnoloxías aplicadas ao ámbito do motor, vai protagonizar unha xornada no Centro GaiásTech da axencia AMTEGA (Axencia para a Modernización Tecnolóxica de Galicia). A sesión, que se desenvolve en formato mixo (de xeito presencial e en streaming para todas as persoas interesadas, estean onde estean), servirá para que Pablo Alberto Castro, co-propietario e apoderado de Autoxuga, presente os detalles dunha aplicación tecnolóxica que permite aforrar entre un 25% a un 30% de combustíbel nos coches, amais de reducir a pegada de CO2 nun 45%, evitar custosas avarías e prolongar a vida útil dos automóbiles modernos.
As posibilidades do software en cuestión, desenvolvido integramente por Autoxuga, mostraranse dun xeito didáctico e claro para que “calquera persoa, teña os coñecementos que teña sobre motor e eficiencia, saiba o que facer para avanzar en sustentabilidade e aforro en materia de uso de combustíbel”.
Para asistir presencialmente á xornada ou ben conectarse por streaming a través de computador ou teléfono móbil cómpre facer a inscrición no Centro GaiásTech na ligazón específica habilitada.
Segundo avanza Pablo Alberto Castro respecto da relevancia que adquire a xornada no contexto actual de escalada de prezos, “pola importancia do tema e como se trata de aforrar combustíbel e reducir a pegada de carbono, esta cornada cremos que pode ser de gran utilidade”.