A experiencia de Xbox faise portátil da man de Asus

Xbox e Asus uniron forzas para lanzar un par de consolas portátiles que beben do éxito da Steam Deck de Valve, pero combinando o ecosistema de Xbox coas prestacións dun PC con Windows 11: a ROG Xbox Ally e a ROG Xbox Ally X.
A Xbox Ally incorpora un procesador AMD Ryzen Z2 A, 16 GB de RAM e 512 GB de almacenamento SSD, equilibrando autonomía e rendemento, mentres que a Xbox Ally X dá un salto cualitativo ao integrar o AMD Ryzen AI Z2 Extreme, 24 GB de RAM e 1 TB de almacenamento SSD. Ademais, engade gatillos con resposta háptica para unha inmersión superior.
Ambos dispositivos permiten xogar de xeito nativo, por streaming mediante Xbox Cloud Gaming ou a través do xogo remoto conectándose a unha consola Xbox situada noutra estancia. Ademais, ao empregar Windows 11, ofrecen acceso a todos os xogos das principais tendas dixitais para PC, como Steam, Battle.net ou Epic Games, e a ferramentas como Discord ou Twitch.
As consolas arrancan directamente na nova Xbox Full Screen Experience, deseñada para ofrecer unha navegación fluída e intuitiva en pantallas táctiles e controladores. Esta interface integra a Xbox Game Bar, agora mellorada para dispositivos portátiles grazas á colaboración con Asus e o seu sistema Armoury Crate.
A experiencia permite acceder facilmente ao catálogo completo de xogos instalados en diferentes plataformas, incluíndo Game Pass, sen necesidade de cambiar de aplicación nin iniciar sesión de novo. Ademais, inclúe botón Xbox físico, opcións de accesibilidade adaptadas e un deseño ergonómico inspirado nos mandos Xbox tradicionais.
A experiencia multiplataforma esténdese con Xbox Play Anywhere, permitindo xogar aos mesmos títulos en consola, PC ou Xbox Ally sen custo adicional e conservando progresos e logros. Os novos usuarios tamén poderán acceder a Game Pass sen custo inicial.
Roblox estará dispoñible desde o lanzamento en versión nativa optimizada para estas consolas. Ademais, integrarase Gaming Copilot, un asistente que axuda a mellorar habilidades, descubrir xogos e conectar con amizades e comunidades.
Está previsto que estas novas máquinas cheguen ao mercado de cara á campaña do Nadal, detallándose nos vindeiros meses as datas concretas e os prezos que terán nos distintos mercados.