A feira de videoxogos E3 cancélase por 4º ano consecutivo

xoves, 30 de marzo do 2023 Marcus Fernández

Nas últimas semanas soubemos que as principais compañías do sector do videoxogo non ía ter unha presenza oficial no Centro de Convencións de Los Angeles onde se celebraría a feira E3 no mes de xuño, polo que o retorno do evento a un formato presencial puro parecía perigar, en boa medida porque a meirande das compañías consolidou os seus formatos en liña para realizar os seus grandes anuncios de xeito independente (sen ter que competir pola atención do público e os medios), e finalmente a Entertainment Software Association tivo que renderse á evidencia e na páxina web oficial do E3 publicaron unha mensaxe anunciando a cancelación total da feira, tanto en formato físico como dixital.
Aseguran que van avaliar o futuro desta cita, pero resulta evidente que sen a presenza dos xigantes do sector un grande evento non é economicamente sustentable, e a presenza nun evento presencial deste tipo resulta cada vez máis difícil de xustificar economicamente.
Cómpre salientar que a cancelación da feira en 2020 e 2021 por mor da COVID-19 non parece ser a causa desta crise, xa que a feira levaba perdendo pulo moitos anos, e as grandes compañía tamén levaban varias edicións reducindo paulatinamente a súa presenza en favor a eventos de seu. Que en 2022 non se puidese realizar unha edición presencial do E3 xa era un sinal das dificultades que existían para recuperar o evento, e agora constátase que a situación podería ser crítica, e parece bastante probable que a meirande feira de videoxogos do mundo no volva celebrarse nunca máis.

PUBLICIDADE