A fibra óptica chegará ao 85 por cento de Vedra no vindeiro ano
venres, 2 de outubro do 2020
O
85% do termo municipal de Vedra
disporá de fibra óptica antes de finais de 2021. Así o informou
este venres 2 de outubro o Goberno local, que deu conta dos traballos
despregados pola operadora Telefónica no seu territorio. Neste
intre, a compañía atópase afrontando o deseño da alimentación e
a definición das zonas nas que se situarán as distintas cabeceiras
de distribución. O Concello sinalou que a nova rede irá en paralelo
á existente, o que facilitará o seu despregue, implicando ademais
un importante aforro de custes e traballos.
Esta
distribución levará a fibra óptica a máis de 90 lugares e rúas
do concellos coa posibilidade de que no futuro este número poda ser
ampliado. A previsión do Goberno local e da operadora é a de
alcanzar o cincuenta por cento da poboación antes de finais de ano e
o resto ata o 85% antes de que remate 2021 conectado en total 1.165
unidades inmobiliarias.
O
seguinte paso será a solicitude dos permisos particulares precisos
para elaborar os estudos técnicos de campo dos que sairán o deseño
final da rede. A fibra óptica instalarase nas canalizacións xa
existentes e só en caso de que fora necesario, por calquera causa
non prevista, realizaríase obra civil previa solicitude dos permisos
necesarios.
A
respecto das potencialidades que se lle abren á cidadanía con este
fornecemento tecnolóxico, o Concello explica que a fibra óptica é
un tipo de cable realizado con vidro ou plástico cun algo máis de
grosor có cabelo humano. As dúas principais vantaxes son a
posibilidade de xuntar, en moi pouco espazo, milleiros de cables de
conexións e achegar, ademais, unha maior velocidade na transmisión
de datos.
“No
contexto actual as posibilidades de teletraballar, teleformarnos ou
comunicarnos plenamente con outras persoas pasan por forza por ter
unha boa conectividade”, apunta o equipo de Goberno local,
engadindo que “a fibra óptica en Vedra suporá un valor engadido
para un concello próximo a capital de Galicia pero coa tranquilidade
e as vantaxes do medio rural”.