A fibra óptica de Telefónica xa está a disposición do 35% da poboación de Lugo

xoves, 13 de febreiro do 2020 Fernando Sarasketa

Telefónica fixo reconto da presenza da súa tecnoloxía de fibra óptica (tecnoloxía FTTH, Fiber To The Home) na provincia de Lugo. Nela, segundo fai saber a operadora, a fibra da operadora xa chegaría ao 35% da poboación. Este fito, como o máis recente relativo a Pontevedra (coa súa taxa do 60%) e o referido á provincia da Coruña (coa súa porcentaxe do 56%), foi unha realidade grazas aos máis recentes plans de colaboración público-privada para “situar a Galicia na vangarda das infraestruturas de telecomunicacións”, explica Telefónica, engadindo que o feito de chegar ao 35% da poboación de Lugo supón un total de 88.703 vivendas e negocios con acceso á fibra da operadora e unha suba do 21% con respecto ao exercicio anterior (2018).
A compañía engade que ao longo de 2019 sumáronse 15.369 novas unidades inmobiliarias (vivendas, locais, negocios, empresas, polígonos industriais, etc.) e a previsión é que este ano 2020 a cobertura con FTTH chegue a 16.875 novas unidades (39 novas localidades), completando a extensión de fibra nuns 200 núcleos, moitos deles orograficamente complexos e dispersos.
Recursos propios e posibilidades
A empresa lembra que o fornecemento de fibra óptica en Galicia realizouse “con recursos propios e cos achegados polos programas de axudas de extensión de banda larga das administracións autonómica e central”.
A fibra óptica permitirá aos usuarios de Telefónica ir incrementando o uso de banda larga nos próximos anos “na medida que a progresiva dixitalización das actividades particulares, profesionais e empresariais así o esixa”, sinala a compañía, engadindo, no capítulo de vantaxes e beneficios que se poñen en xogo con estes equipamentos, “que a fibra óptica de Movistar ofrece voz con alta calidade nas chamadas, máxima velocidade de conexión a Internet e conectar varios dispositivos a Internet simultaneamente sen reducir velocidade de conexión, entre outras vantaxes”. Ademais, se o usuario dispón de Movistar+ terá acceso a canles de alta definición co dobre de resolución que a TDT ou o DVD e poderá gozar dos seus contidos mentres navega por Internet.

PUBLICIDADE