A fibra óptica xa está dispoñíbel en Cima de Vila, no concello de Lugo

venres, 25 de agosto do 2023 S. P.

David Llano, responsábel de Adamo en Galicia, e a veciñanza de Cima de Vila

A operadora Adamo vén de completar boa parte dos traballos para despregar fibra óptica FTTH en Cima de Vila (Pereda, Lugo), que permitirá subministrar á veciñanza e ás empresas un servizo co que non contaban até o de agora: Internet ultrarrápida.
Segundo confirmou a operadora, a despregadura de fibra neste núcleo rural lucense veu acompañada dunha manchea de dificultades. “Habilitar fibra óptica non sempre é unha tarefa sinxela, de feito, resulta habitual que xurdan dificultades técnicas, obstáculos no terreo e ata problemas administrativos. En circunstancias así, as empresas que despregan a infraestrutura ven recortada a súa marxe de manobra e os principais afectados, por suposto, son os cidadáns que carecen desa tecnoloxía e están a desexar gozar dela. Foi o caso de Cima de Vila”, explicou Adamo, que, malia os atrancos no camiño, festexou coa veciñanza, esta semana, a chegada da Internet de alta velocidade. De feito, os días pasados leváronse a cabo as activacións de servizo nos primeiros fogares e a previsión da compañía é completar o proceso de cableado en outubro.
David Llano, responsábel de Adamo en Galicia, comprometeuse expresamente coa asociación de veciños a mediados de xullo a que a fibra óptica fose unha realidade en Cima de Vila. “Logramos adiantar os traballos desde o punto no que quedaron parados, co esforzo dos nosos técnicos, para acurtar os prazos ao máximo. Desde Adamo, comprometémosnos publicamente a que os habitantes de Cima de Vila tivesen fibra óptica e xa é un feito”, concluíu.
Adamo chegará a 100.000 fogares da provincia
A operadora lembra que os traballos de Cima de Vila forman parte de todo un plan de expansión da empresa, que acumula máis de 70.000 vivendas cableadas en 35 concellos lucenses desde mediados de 2018. Para sufragar tal actuacións, a compañía investiu 20 millóns de euros e contratou a 300 traballadores locais en enxeñería, despregadura, mantemento e comercialización. “Malia todo”, engaden fontes da empresa, “o crecemento prosegue, xa que levaremos Internet de alta velocidade a 33.000 fogares rurais de Lugo entre 2023 e 2024 para sumar máis de 100.000 inmóbeis conectados á nosa rede de alta velocidade no conxunto da provincia”.

PUBLICIDADE