A formación galega en competencias dixitais abrangue 2.150 accións para o vindeiro curso

Este venres 23 de xuño presentouse o novo Plan de Formación do Profesorado para o curso 2023-24, que incorpora un total de 5.800 actividades formativas (un 5% máis de oferta) e 120.000 horas de formación (un 7% de incremento), para o desenvolvemento da cales a Consellería de Cultura e Educación destina un orzamento de 9,1M€ (un 30% máis). Trátase, en palabras do conselleiro Román Rodríguez, “dun investimento récord”, con 130.000 prazas ofertadas.
O plan recolle unha oferta “diversificada e equitativa”, dixo, engadindo que o programa artéllase en torno a seis eixos concretos, que son o didáctico, o dixital, a innovación, a convivencia e inclusión, a comunicación e pluriligüismo e a atención a colectivos específicos.
Un dos eidos máis destacados do plan, con 2.150 accións formativas, é a formación en competencias dixitais, unha formación aliñada aos novos proxectos educativos en marcha “onde cada vez ten máis peso a investigación, a innovación e a transferencia de coñecemento”, sinalou, lembrando que a partir do vindeiro curso vanse incorporar os Polos Creativos a todos os centros de Primaria e ESO, polo que os docentes atoparán no plan toda a formación necesaria para sacarlle o máximo proveito.
Deseñouse un itinerario formativo específico de Polos Creativos que inclúe a constitución dun equipo de asesores mentores integrado por 35 profesionais vinculados aos Centros de Formación do Profesorado, que se encargarán da formación en metodoloxías de deseño e a creación de proxectos, asesoramento e mentoring. Tamén se crearán redes de mentoring e asesoramento para aqueles Polos que están no seu segundo ano de implantación e formación específica para os de nova incorporación.
No balance do acadado neste curso acabado de rematar en materia de competencia dixital, acadárona un total de 20.000 docentes. Deles, o 56% lograron certificar os niveis A2 e B1 de competencias dixitais.