A galega Aerocamaras desembarca en La Palma para tentar rescatar os cans atrapados de Todoque
luns, 18 de outubro do 2021
A
empresa galega Aerocamaras, centrada no desenvolvemento e na
formación no ámbito UAV (vehículos aéreos non tripulados) vén de
mobilizar os recursos tecnolóxicos e humanos para tentar rescatar
aos cans atrapados en La Palma dos que escoitamos falar
estes días nos medios, medios que puxeron o foco no seu número
(catro) e na complexa situación na que se atopaban (ficaron cercados
pola colada de lava que chegou á localidade de Todoque). Os
efectivos de Aerocamaras desembarcaron esta fin de semana en La Palma
e están á espera do permiso para intervir. Para extraer a estes
animais, a firma galega utilizará drons de carga especificamente
preparados para culminar o que consideran “unha fazaña pioneira en
España”.
Os
técnicos e operadores de dron despregados estre luns para preparar a
evacuación dos animais, expuxeron a súa estratexia de rescate ante
os representantes do Cabildo, da Unidade Militar de Emerxencia (UME)
e do Posto Avanzado. Unha vez formalizado o plan por escrito e tras o
permiso definitivo por parte das autoridades, o equipo de Aerocamaras
procederá a recoñecer o terreo onde realizará unha extracción
que, á espera de coñecer a evolución da súa análise, realizarase
nos próximos días.
Segundo
informa a empresa de Lalín, o rescate “foi planificado
coidadosamente”. Así, indican, “os vehículos aéreos comezarán
entregando comida e bebida aos cans, o que nos permitirá
inspeccionar cunha cámara de 30 aumentos e outra termográfica a
localización onde realizaremos a extracción mentres afacemos aos
animais ao ruído e á presenza do UAS”. Cando chegue o momento de
executar o proceso de evacuación, a empresa empregará un dron de
carga dotado dun sistema propio de loxística adaptado ás
características dos animais, xunto a outra aeronave de apoio, con
que o piloto encargado da operación poderá planificar o voo do
rescate con seguridade.
Respecto
á execución do rescate, Aerocamaras desprazou este 18 de outubro
aos seus mellores técnicos até as proximidades do volcán, un
traslado que foi posíbel grazas ao apoio de Iberia e Peninsula, que
puxeron a disposición dos operadores da compañía galega os seus
avións e ferris sufragando os gastos en loxística. Pola súa banda,
a protectora de animais, Leales.org tamén apoiou o rescate desde o
primeiro momento realizando unha campaña de recollida de fondos para
sufragar os gastos das protectoras que teñan débedas coas clínicas
veterinarias de Canarias.
Aerocamaras
engade que a opción de que a UME e o Grupo de Emerxencias e
Salvamento (GES) realizasen a extracción en helicóptero foi
desbotada polo elevado risco que levaría sobrevoar o magma, e o
acceso por terra tamén foi cualificado como inviábel debido ao
cerco de cinza e lava que os rodea.
Por
este motivo, engade a firma galega, “as aeronaves non tripuladas
(UAS) son a primeira (e única opción) dos cadelos”.
“Estamos
preparados para realizar o rescate. A vida dos cans está en xogo e o
noso obxectivo é salvalos canto antes, é necesario que os saquemos
de aí de maneira inminente. Só necesitamos que as autoridades nos
autoricen voar”, asegura Jaime Pereira, director executivo de
Aerocamaras.