A galega Logicmelt presenta un proxecto pioneiro para mellorar con IA a seguridade en recintos

A nova firma innovadora galega Logicmelt, instalada no Polígono de Bouzas da Zona Franca de Vigo e especializada na aplicación de Intelixencia Artificial, Visión e Computación Edge para optimizar a eficiencia e seguridade na industria, desenvolve un vangardista proxecto piloto no Autolab, o laboratorio da High Tech Auto (Zona Franca), destinado a mellorar a seguridade en recintos e desenvolvido con IA.
Este luns 24 de febreiro o delegado do Estado na Zona Franca, David Regades, puido coñecer os detalles do proxecto, baseado nun sistema pioneiro de cámaras de videovixilancia para dar alertas en tempo real para o seguimento de persoas, cun sistema múltiple de cámaras. O programa permite seleccionar a mellor cámara de forma automática, as contaxes parciais de persoas que entran e saen en cada zona do recinto ou o cálculo do mapa de calor nas zonas máis visitadas, cousa de utilidade, por exemplo, en centros comerciais ou outro tipo de eventos públicos para medir que áreas suscitan un maior interese.
En sistemas industriais, o programa é capaz de acceder a zonas perigosas, alertar ao persoal de seguridade, bloquear o aceso dunha máquina de risco ou realizar incluso unha parada automática en caso de detectar persoas preto, co obxectivo de reducir o perigo e o número de accidentes laborais.
LogicMelt, startup fundada no ano 2020, ten 10 empregados e mantén o seu obxectivo principal de transferencia de coñecemento e tecnoloxía ao sector manufactureiro e a empresas de alicerce tecnolóxico. Dispón de áreas de especialización e servizos para ofrecer solucións personalizadas que melloran os controis de calidade e os procesos produtivos e é provedor de Intelixencia Artificial e Edge a través de diversos programas de incubación e aceleración empresarial de Zona Franca como: High Tech Auto (HTA) ou Business Factory Auto (BFA).
Desde hai un ano Logicmelt fai uso do AutoLab para desenvolver e mellorar os seus produtos. Neste espazo, aproveitaron a infraestrutura dispoñíbel, incluída a rede 5G, para desenvolver este novo produto destinado á seguridade e as impresoras 3D para a fabricación de solucións personalizadas e prototipos.