A galega SIVSA redeseña a aplicación de clientes de FAIN Ascensores

mércores, 29 de xullo do 2020 Sonia Pena

A empresa galega SIVSA, centrada en ferramentas informáticas avanzadas, será a encargada de redeseñar a aplicación de clientes de FAIN Ascensores, referente estatal no sector da elevación, que volve confiar na firma de Vigo para impulsar a súa vertente tecnolóxica, desta volta dando unha viraxe á arquitectura da súa aplicación de usuarios. O obxectivo é optimizar o rendemento da mesma e mellorar a experiencia dos destinatarios.
Entre os cambios efectuados na ferramenta, SIVSA salienta a carga do contido necesario por cada pantalla e a redución do tamaño dos ficheiros. Outro dos avances realizados reside na adaptación das páxinas á guía de estilo de FAIN Ascensores e na mellora da xestión do estado da aplicación. En canto ao redeseño da maquetación, modificouse o menú lateral, así como as pantallas de Inicio, Resumo, Información, Facturas, Mantementos, Correctivos, Telemetría e Pantallas.
Como dixemos, non é a primeira vez que SIVSA colabora coa empresa de elevación, xa que en 2018 a firma de Vigo encargouse de desenvolver un novo sistema de mobilidade para FAIN. Este sistema permítelle xestionar as 55.000 ordes de traballo mensuais coas que operan ao redor de 350 técnicos de campo e 120 usuarios de backoffice da dita compañía, repartidos en 27 delegacións e en dous idiomas.

PUBLICIDADE