A igualdade e a innovación serán os eixes da sexta edición dos premios Son Muller

luns, 30 de outubro do 2023 S. P.

Lugo acolle este luns 30 de outubro a presentación da nova edición dos premios Son Muller, destinados a visualizar e reivindicar o puxante emprendemento e a innovación feminina. Na cita, celebrada no CEI Nodus, participaron a secretaria xeral da Igualdade, Sandra Vázquez, o deputado de Formación, Ensino e Economía do Coñecemento, Miguel Fernández, a presidenta de AELU, Anjhara Gómez, e o concelleiro de Dinamización Económica de Lugo, Mauricio Repetto, entre outras autoridades.
A sexta edición dos galardóns vén da man, novamente, da Asociación de Mulleres Empresarias da Provincia de Lugo (AELU) co apoio da Deputación.
Trátase duns galardóns que “valoran o esforzo, a innovación e o talento das mulleres empresarias e emprendedoras da nosa provincia, e que reivindican ao mesmo tempo a necesidade de seguir avanzando en igualdade, para que mulleres e homes teñamos as mesmas condicións e oportunidades”, sinalaron a presidente da AELU e o deputado.
A Deputación de Lugo achega 3.500€ para a celebración desta cita, que terá lugar o 15 de decembro no Museo Interactivo da Historia de Lugo (MIHL), e que inclúe tres categorías: Son emprendedora, Son empresaria e Son empresaria rural. As candidaturas poden presentarse dende o vindeiro xoves 2 ao 26 de novembro a través de AELU.
O deputado subliñou a liña de colaboración “aberta e permanente” que mantén a institución provincial coa Asociación de Mulleres Empresarias, tanto nestes premios, como tamén noutras iniciativas encamiñadas a fortalecer e diversificar o tecido empresarial liderado por mulleres, como, por exemplo, o programa Aulas Abertas, que se está desenvolvendo na actualidade por distintos puntos da provincia. Unha colaboración que Miguel Fernández enmarcou na prioridade da Deputación de “apoiar aos sectores produtivos para xerar riqueza e emprego, o que significa fixar poboación no territorio, sobre todo no noso rural”.
A Asociación de Mulleres Empresarias dota os premios Son Muller con 1.000€ en metálico á gañadora e o segundo, en 500€. En ambos casos, as galardoadas obterán un ano de cota gratuíta como asociadas de AELU e un xogo de artesanía en cerámica, Matrioskiñas Galegas, elaborado e deseñado exclusivamente para estes premios.
Haberá tamén un recoñecemento especial a unha empresaria lucense referente e pioneira no eido social e económico de Lugo.
O xurado estará formado por representantes da xunta directiva de AELU, e personalidades de recoñecido prestixio, pertencentes a distintos ámbitos das administracións, a empresa e a sociedade lucense.
Poderán optar aos galardóns as emprendedoras e empresarias que teñan o seu domicilio social e fiscal como empresa na provincia, que estean dadas de alta como autónomas ou sexan parte dunha sociedade empresarial.
No acto tamén participou a secretaria xeral de Igualdade, Sandra Vázquez, quen destacou a aposta da Xunta polo emprendemento feminino, que se revalorizará en 2024 e que acumula 23,3 millóns de euros de apoio investidos nos últimos 14 anos. En concreto, salientou os 27 anos que cumpre en 2023 o programa EMEGA de fomento do emprendemento e do emprego feminino, así como de medidas de conciliación para as mulleres autónomas e traballadoras. En total, esta iniciativa -que se reeditará en 2024- permitiu a creación de 2.084 empregos desde 2009 e o mantemento doutros 648, dixo.

PUBLICIDADE