A innovación aeronáutica volverá a Lugo da man do Criterium
venres, 5 de xullo do 2019
O
Aeródromo das
Rozas, en Lugo, vai ser novamente o escenario do evento Criterium
Aeronáutico, que chega á súa edición número 14. Unha vez
máis e no que á temática de Código Cero se refire, será unha
cita acaída para as persoas que queiran ampliar información e
recursos sobre as máis avanzadas e vangardistas tecnoloxías UAV
(vehículos aéreos non tripulados, polas súas siglas en inglés).
Onte mesmo foron presentados os detalles desta nova convocatoria, que
se celebra os vindeiros 25, 26, 27 e 28 de xullo. A cita vén da man
do Real Aeroclube de Lugo coa colaboración da Deputación de Lugo
(que achega 10.000 euros para o seu desenvolvemento), e os Concellos
de Lugo e Castro de Rei.
Na
presentación, na que tamén se deron a coñecer datos sobre a XXXVI
Volta Aérea a Galicia, participaron o deputado de Deportes en
funcións, Pablo Rivera Capón, a concelleira do Concello de Lugo,
Ana González Abelleira, o alcalde de Castro de Rei, Francisco Balado
Teijeiro, xunto co secretario xeral do Real Aeroclube de Lugo, Marco
Antonio López Queiroz.
Rivera
Capón salientou a importancia desta cita que ten varias vertentes:
por unha banda, a Volta a Galicia (unha proba puntuábel para os
deportistas aeronáuticos), e, pola outra, o Criterium Aeronáutico
(que ten un obxectivo divulgativo, pois da a posibilidade coñecer
esta modalidade deportiva entre os veciños da provincia, ao tempo
que dinamiza toda a contorna, pois é quen de atraer cada ano a 5.000
persoas).
O
deputado tamén explicou que “nesta ocasión contamos coa
participación da Patrulla Águila, que deleitará aos asistentes
coas súas acrobacias”. Na súa opinión, “será todo un
privilexio contar coa patrulla e agardamos que a súa colaboración
esperte aínda máis interese neste evento, facendo que moitos máis
seareiros aos deportes aéreos coñezan a nosa provincia e as súas
paisaxes”.
Durante
os catro días que dura o Criterium celebraranse chimpos en
paracaídas, bautismos de voo, exhibicións acrobáticas, labores de
apagalumes, simuladores, exposicións e sorteos para voos de balde. O
acceso para ver as actividades será de balde, se ben é necesario
anotarse e aboar determinadas contías para participar no
paracaidismo ou nos voos. Máis información e inscricións no correo
criteriumaeronautico@aerolugo.es.