Olga C. Santos fai no CIA de Ourense un percorrido pola Intelixencia Artificial no deporte
venres, 7 de maio do 2021
A
UNED Ourense e o Centro de Intelixencia Artificial de Ourense
organizaron este 7 de maio unha nova sesión en streaming do
ciclo Os Venres con IA, no que participan expertos en
tecnoloxías avanzadas da Universidade a Distancia mostrando as
diversas aplicacións do Big Data, o Machine Learning ou
o Deep Learning en todo tipo de ámbitos empresariais,
sociais, informativos e de investigación. Este
venres foi a quenda de Olga C. Santos, investigadora e profesora
titular da UNED no Departamento de IA amais de ser a coordinadora do
seu mestrado sobre estas tecnoloxías.
A
doutora Santos expuxo ante o Centro de IA de Ourense os retos que
ofrecen os deportes para o desenvolvemento de sistemas intelixentes
que faciliten a súa práctica personalizada e os avances realizados
con técnicas de IA sobre datos recolleitos con sensores inerciais.
Logo
dunha introdución sobre as posibilidades que abren estas tecnoloxías
avanzadas no ámbito da práctica deportiva, achegando casos
concretos de éxito, a investigadora centrouse na liña de
investigación PhyUM, que desenvolve dende 2014 na UNED e que pon o
foco no modelado de usuario físico: “En PhyUM investigamos sobre a
computación do movemento humano para ofrecer unha axuda
personalizada ao usuario. O principal obxectivo é a aprendizaxe de
habilidades motoras durante a realización dunha actividade física
de forma que se vaia mellorando a técnica, pero tamén se poden
abordar outros obxectivos, como apoiar a aprendizaxe kinestésica
axudando a asimilar conceptos teóricos, o control de movementos
involuntarios para a xestión emocional e mesmo aspectos máis
relacionados coa saúde, como a prevención de lesións, apoiar a
rehabilitación motora e favorecer o envellecemento activo”.
Para
iso, o grupo de investigación de PhyUM está a desenvolver sistemas
que monitorizan en tempo real os movementos realizados, comparan a
execución desenvolvida coa esperada segundo o modelo obtido a partir
dun practicante experto e ofrecen retroalimentación personalizada
cando sexa necesario.