A mostra Galicia100 abre as súas portas físicas e dixitais
mércores, 11 de maio do 2016
Finalmente abriu as súas
portas na sede de Afundación en Santiago (rúa do Vilar 19) a
exposición que achega un percorrido pola historia e a identidade de
Galicia a través dun centenar de cousas con capacidade de abonda
para definilas (a historia e máis a identidade). Cousas como o
mosquetón de Foucellas, o báculo e o anel do bispo Gonzalo (que
adiantamos os días pasados salientando a posibilidade de velos en
3D) ou a bandeira do Consello de Galiza. Falamos da mostra
Galicia100, que vén da man
do Consello da Cultura Galega (coa colaboración de Afundación
e Abanca) e que
foi inaugurada este martes polos principais representantes das ditas
entidades, Ramón Villares (presidente do CCG) e Miguel Ángel
Escotet (presidente de Afundación). A apertura da exposición
tamén contou coa presenza do seu comisario, Manuel Gago, profesor da
USC, director de culturagalega.org
e editor de Capítulo 0.
Por certo que a TVG está a amosar diariamente (desde o luns 25) unha
escolma das pezas seleccionadas. Na
inauguración tamén participou o presidente da Xunta, Alberto Núñez
Feijóo.
Segundo fixo saber Gago
no devandito acto, a exhibición ten unha ampla e vizosa vertente
tecnolóxica: conta con catálogo, aplicación para dispositivos
móbiles e un sitio web (galicia100.consellodacultura.gal)
que aposta pola interactividade na dixitalización do patrimonio.
Gago engadiu que “a ofrece unha lectura da identidade e da cultura
galega a través de pezas significativas, escollidas pola súa
capacidade de representar tempos, épocas, xentes e mentalidades”.
Ou sexa, apuntou, trátase de ofrecer ao visitante “unha
experiencia na que os obxectos cobran protagonismo como punto de
partida para contar como somos e como chegamos a ser o que somos”.
A exposición amosa unha
selección de cen obxectos, entre os que hai pezas de ámbito cotiá,
como pode ser un morteiro de améndoas de mediados do século XVII,
un bidón de leite que representa a evolución do sector agrogandeiro
ou un pote de queimada, xunto con “outros máis emblemáticos”
como a bandeira do Consello de Galiza ou a Mariscala, cadea coa que
se sospeita que foi encarcerado o mariscal Pardo de Cela. A mostra
ficará aberta até o 18 de setembro en Santiago, desde onde iniciará
un percorrido que a levará ata a Coruña e Vigo.
Un dos elementos
fundamentais da proposta é o seu catálogo, no que atoparemos “unha
lectura cronolóxica dos obxectos” e no que estes están
comentados, “en textos moi divulgativos”, por máis de sesenta
expertos nunha manchea de eidos de investigación, entre os que están
Francisco Díaz-Fierros, Chus Martínez Domínguez, Emilio Pérez
Touriño, Xurxo Ayán ou David Barro. Este catálogo, ademais de
impreso, dispón de web de seu e unha aplicación de balde para
móbiles e tabletas na que amais dos contidos textuais e gráficos,
temos acceso a contidos interactivos, multimedia e participativos.
Segundo fixeron saber na presentación, catálogo e app
poderanse descargar de balde desde a web da exposición a partir
desta cuarta feira (mércores 11).
A exposición reúne
fisicamente case setenta obxectos da escolma nunha estrutura dividida
en sete grandes módulos (Poder, Territorio, Comunidade, Códigos,
Transicións, Redes e Trasmundo). Na mostra, engadiuse, as pezas
agrúpanse entre si “rompendo o tradicional esquema cronolóxico”
e “buscando o diálogo e as relacións a través de épocas”, das
pezas entre si e delas co visitante. A intención, polo tanto, é
“animar ao visitante a explorar as relacións e os sentidos entre
obxectos, combinando pezas de gran valor e significado histórico con
obxectos cotiás e humildes do noso pasado”.