A nosa tradición cerámica e a impresión en 3D, eixes dun novo obradoiro de Alg-a Lab
martes, 21 de febreiro do 2017
O
espazo de creación Alg-a Lab
(Valadares, Vigo) vai acoller este sábado unha
“exposición-obradoiro” que xunta dous mundos sobre o papel
afastados pero na práctica potencialmente ricos en interactuación:
a cerámica e a impresión 3D. Máis polo miúdo, trátase dunha
actividade para amosar e expoñer a tradición cerámica e oleira da
parroquia de Bamio (Vilagarcía) a través de documentos históricos
e arqueolóxicos e das propias testemuñas orais do lugar. A outra
“metade” desta actividade será a reflexión arredor das
destrezas humanas e as novas tecnoloxías, coa impresión en 3D
“ocupando un lugar destacado na sesión”, informan dende Alg-a
Lab.
A
orixe desta acción está no traballo conxunto despregado pola
Asociación de Mulleres Rurais de Bamio xunto con Beatriz Comendador,
investigadora e profesora da Universidade de Vigo. Este labor
colaborativo materialízase no proxecto Louceiros de Bamio, que
procura atender á memoria oral compartida da parroquia de Bamio (e
do barrio do Campanario ou Os Louceiros), adicada á olería. Segundo
informan dende Alg-a Lab, “a finais dos anos 40, os derradeiros
louceiros de Bamio abandonaron o traballo do barro e na actualidade
non se conserva ningún forno adicado á fabricación de louza e a
tradición perdeuse”.
Na
“investigación híbrida” do proxecto Louceiros de Bamio
participan investigadores e veciñas da zona, e agora súmanse ás
súas fileiras os membros de Alg-a Lab, fornecendo a súa experiencia
en creación independente, revolución dixital e coñecementos
arredor do cambio de paradigma que esta revolución achega (por
exemplo o efecto das impresións en 3D).
A
xornada comezará cunha conversa con representantes da Asociación de
Mulleres Rurais de Bamio e Beatriz Comendador, quen explicarán as
memorias agochadas a través desta forma artesanal de facer a louza,
así como o traballo que están impulsando de cara a recuperar a
memoria da parroquia e a súa contorna. Dende a mañá estará
instalada no Alg-a Lab unha exposición sobre o proxecto Louceiros de
Bamio.
Posteriormente
seguirá unha intervención de Samuel Otero, residente do dito
laboratorio de creación, quen abordará a hibridación na técnica
escultórica; o artesán e as novas técnicas de 3D, seguido dunha
conversa con Eloi Mancebo, impulsor de Feitura, quen falará sobre os
usos que dá a impresión 3D para mellorar a creación de pezas. A
sesión contará cunha exposición efémera de traballos.
Esta sesión enmarcase dentro do Programa
de Estudos en Man Común Ruralidades, Comúns e Feminismos, que é
un espazo crítico de pensamento e acción, impulsado pola
Universidade de Santiago de Compostela, a través do grupo de
investigación Histagra, os sete grupos pertencentes a rede Revolta e
o colectivo Montenoso, e unha ampla rede de colaboradores, e conta
con financiamento da Fundación Daniel & Nina Carasso.