A nova tableta de Xiaomi terá acabado metálico e versión con Windows 10

O fabricante chinés Xiaomi parece querer continuar a trunfar no mercado dos smartphones e as tabletas con terminais elegantes, potentes e económicos, mantendo o rumbo trazado nos últimos meses, pero apostando desta volta polas carcasas metálicas (o que supón un plus de calidade) e algunha sorpresa como o feito de que a súa nova tableta conte co opción de funcionar con Windows 10 na súa versión de 64 GB que sairá á venda a finais de decembro (de xeito que os usuarios poderán optar entre o sistema operativo de Microsoft ou a versión de Android personalizada por Xiaomi).
Deste xeito o Mi Pad 2 sería unha evolución do popular Mi Pad (considerado como a tableta máis semellante ao iPad mini que funciona con Android) que sería un 18% máis delgado e 38 gramos máis lixeiro (quedando nun grosor de 6,95 milímetros e un peso de 322 gramos), e mudaría a súa oferta cromática anterior por un acabado metálico en cor gris escuro ou champaña ouro.
O Mi Pad 2 parece ter potencia dabondo para ser unha tableta máis que competente, xa que funciona cun procesador Intel X5-Z8500 de 64 bits e 4 núcleos a 2,24 GHz, 2 GB de RAM LPDDR3, 16 ou 64 GB de almacenamento interno, pantalla IPS de 7,9 polgadas cunha resolución de 2.048 x 1.536 píxeles (ou sexa, a mesma resolución que o iPad mini 4), cámaras de 8 e 5 Mpíxeles e batería de 6.190 mAh con carga rápida (que sería dabondo para reproducir vídeo até 12,5 horas) a través do seu porto USB tipo C (reversible).
Algunha das prestacións salientables do Mi Pad 3 serían o contar cun modo de lectura que reduce a luz azul para reducir a fatiga visual e, na liña do que fai Apple, conta con detección de presións accidentais na pantalla.
O Mi Pad 2 de 16 GB sairá á venda o vindeiro venres a 999 iuans (146,73 euros), mentres que a versión de 64 GB (con Windows 10) non chegará até finais de decembro a un prezo de 1.299 iuans (190,79 euros).