A nova web de Turismo de Galicia tirará proveito da IA

O director de Turismo de Galicia, Xosé Merelles, clausurou este 12 de novembro a xornada Turismo intelixente: ferramentas de IA para a transformación do sector que reuniu en Ponteareas a representantes da actividade turística de Galicia. No transcurso do acto de peche, Xosé Merelles destacou que o seu departamento está ultimando a licitación da nova web de Turismo de Galicia que “utilizará a intelixencia artificial no seu obxectivo de integrar as tecnoloxías avanzadas para mellorar a definición da oferta e a experiencia turística”.
Segundo explicou o director de Turismo, a aposta pola intelixencia turística e a transformación dixital “vén recollida na Estratexia de Turismo 2030 da Xunta de Galicia que destaca sobre todo o seu potencial para optimizar a xestión de recursos, controlar os fluxos turísticos e apoiar a toma de decisións baseada en datos”.
Engadiu que unha das medidas céntrase precisamente na creación dun espazo de datos turísticos en Galicia, co emprego de técnicas de análise da información a gran escala (Big Data) e IA, “que se están a estruturar a través do Observatorio de Sostibilidade Turística”, salientou Xosé Merelles. No marco desta iniciativa “desenvolveuse xa o novo cadro de mando de datos turísticos, unha ferramenta de monitoraxe do destino que analiza os principais indicadores sobre demanda turística e rendibilidade económica”.
O director de Turismo de Galicia mencionou outros proxectos do seu departamento relacionados coa intelixencia e dixitalización turística, como o sistema de seguimento de datos SIMADA, no que colabora co Cluster de Turismo de Galicia, unha ferramenta gratuíta para empresas de aloxamento, que proporciona datos sobre ocupación e prezos; ou a instalación de sensores de medición no Camiño de Santiago para a toma de decisións baseada en datos.