A patronal de Ribeira acolle os días 18 e 20 de setembro unha xornada sobre mercadotecnia dixital con Javier Rocamora

xoves, 14 de setembro do 2023 S. P.

A Asociación de Empresarios de Ribeira vai organizar este mes de setembro unha xornada de gran interese para as empresas locais, xa que o obxectivo da mesma é compartir recursos tecnolóxicos que incrementen a produtividade, as vendas, a competitividade, a visualización, a presenza en buscadores e a eficiencia. A xornada Aprende a deseñar unha estratexia de marketing dixital para unha pequena empresa celebrarase o días 18 e 20 de setembro no local que a asociación ten na rúa Rosalía de Castro de Ribeira.
A persoa encargada de impartir os contidos será Javier Rocamora, consultor de mercadotecnia dixital, xestión de redes sociais e comercio electrónico. As prazas son limitadas. As incricións cómpre facelas a través da conta correo@empresariosriveira.com.
A xornada é froito da colaboración entre a patronal de Ribeira e a Cámara de Comercio de Compostela.
O relator da xornada
Como dixemos, a persoa encargada de impartir estes contidos será o experto en ecommerce e redes sociais Javier Rocamora, profesional das novas vertentes da xestión comercial, amais de consultor autónomo e formador especializado neste campo en concreto. Rocamora publica de xeito regular artigos en Marketing For eCommerce, unha das publicacións online de referencia a nivel nacional en comercio electrónico. Entre seus proxectos máis destacados figuran a redacción de contidos no proxecto Vendes en Internet? da entidade estatal Red.es, o deseño e implantación da estratexia dixital a nivel europeo da multinacional islandesa Saeplast, a xestión da campaña estival na Rede de 2017 para Turismo de Galicia e o Camiño de Santiago ou a súa participación en proxectos para Telefónica, Applus, Carrefour, Media Markt, Grupo Vegalsa-Eroski, Pescanova, Elogia Media, BAP Conde, Roi Scroll e un longo etcétera.

PUBLICIDADE