A primeira muller almirante da navegación española, protagonista do novo podcast de Aquí faltan páxinas

mércores, 18 de outubro do 2023 S. P.

A considerada primeira muller en ocupar o cargo de almirante na historia da navegación española, Isabel Barreto, protagoniza este mes de outubro o programa da Deputación de Pontevedra Aquí faltan páxinas, ciclo de relatos sonoros en formato podcast e conferencias que naceu da colaboración da institución provincial coa firma O Cable Inglés para visualizar e reivindicar mulleres galegas extraordinarias relacionadas coa provincia.
Este xoves 19 de outubro o Pazo Provincial acollerá, a partir das 19:00 horas, un faladoiro sobre a traxectoria desta aventureira, descubridora e “adiantada dos mares do sur”, que impartirá a investigadora Eloísa Gómez-Lucena, quen defende a orixe pontevedresa de Barreto. No acto participará a deputada provincial de Igualdade, Sandra Bastos, e conducirao Marián Fernández, de O Cable Inglés, coordinadora da colección.
O faladoiro virá da man de Eloísa Gómez-Lucena, recoñecida investigadora, antropóloga, documentalista e escritora que colabora en diversas publicacións de divulgación histórica e está especializada nos artigos sobre personaxes femininas dos séculos XVI e XVII e que sostén que Barreto naceu en Pontevedra e probablemente foi bautizada na basílica de Santa María a Maior.
Ademais da conferencia, a historia de Isabel Barreto estará tamén dispoñibel a partir do xoves no podcast de Aquí faltan páxinas (nas principais plataformas de retransmisión en directo e na páxina web da institución provincial) e unha ruta virtual que inclúe como lugar clave da provincia na súa biografía a basílica de Santa Maria A Maior, na que foi bautizada Isabel Barreto.
O proxecto Aquí faltan páxinas inclúe unha antoloxía de 12 podcasts, un por cada mes deste 2023, para pór en valor os logros de María Soliña, Elisa Patiño, Olimpia Valencia, Maruja Mallo, Concepción Arenal, Antonina Sanjurjo, María Vinyals, Ernestina Otero, Ángeles Alvariño, Isabel Barreto, Carolina Otero e Sofía Novoa.

PUBLICIDADE