A procura de novos camiños dixitais para as nosas bibliotecas terá premio

martes, 18 de setembro do 2018 Fernando Sarasketa

Distinguir e mostrar os esforzos por renovar tecnoloxicamente as nosas bibliotecas e as súas canles de interacción coa cidadanía. Este é o gran obxectivo do Premio de Innovación Bibliotecaria de Galicia, un galardón que vén de ser estreado pola Consellería de Cultura e Educación (Subdirección Xeral de Cultura) e que se dirixe, en termos máis concretos, a recoñecer os proxectos que melloren a experiencia das lectoras e lectores nas nosas bibliotecas e axencias de lectura, que sexan “axeitados e pertinentes para o contexto local no que se atopan” e que fagan gala de sustentabilidade e creatividade.
Dotado con 3.000 euros e un distintivo para os gañadores, ao premio poderán presentarse todos aqueles centros que pertenzan á Rede de Bibliotecas Públicas de Galicia e que teñan un proxecto ou boas prácticas que estean xa executados ou desenvolvidos no momento da convocatoria do concurso.
Os proxectos ou boas prácticas que opten ao premio teñen que estar relacionados coas áreas de aprendizaxe ao longo da vida; biblioteca dixital e redes sociais; cohesión e inclusión social; posta en funcionamento de servizos innovadores e/ou sustentabilidade ambiental.
O prazo de presentación de solicitudes remata o día 18 de outubro e as bases poden consultarse no DOG.

PUBLICIDADE