A programación con Arduino chega este mes ao viveiro de Barro
venres, 11 de xaneiro do 2019
SmartPEME,
o programa de capacitación tecnolóxica para PEME, profesionais e
autónomos da Deputación de Pontevedra, regresou en xaneiro cunha
manchea de obradoiros TIC dirixidos a facilitar a dixitalización e a
competitividade entre os nosos autónomos, empresas e profesionais.
Ás 21
accións preparadas para a comarca de Vigo (nos centros SmartPEME de
Ponteareas, Vigo e Porriño), ás 14
previstas para Pontevedra e a contorna de Lalín e ás sete
citas de Cambados cómpre sumar agora os
catro obradoiros de Barro-Meis, a desenvolver no viveiro de Barro.
Haberá oportunidades para adestrarnos en programación avanzada co
hardware-software libre Arduino e en impresión en 3D.
As
inscricións nos devanditos obradoiros pódense facer no número de
teléfono 886 20 20 20, o correo electrónico info.smartpeme@depo.es
ou a páxina web www.smartpeme.depo.es.
Todas estas citas teñen o nexo común de facilitar “a
adaptación das empresas e proxectos emprendedores da provincia ao
novo escenario dixital no que desenvolver as súas actividades e
aproveitar as ferramentas existentes co obxectivo de aumentar a súa
competitividade”.
A
primeira cita foi onte ás 18 horas, coa acción Programación con
Arduino I. A segunda acción, Programación con Arduino II
impartirase o xoves, 17 de xaneiro, ás 18 horas. Pola súa banda,
Impresión 3D orientada á xoiaría impartirase o luns 28 de
xaneiro, ás 10 horas. Por último, o xoves 31 de xaneiro, ás 18
horas, terá lugar o curso Programación con Arduino III.
A
oficina SmartPEME de Barro atópase no viveiro de empresas do
Polígono e as inscricións pódense facer no número de teléfono
886 202 020, no enderezo electrónico info.smartpeme@depo.es ou na
páxina web www.smartpeme.depo.gal.
Datos
sobre o Proxecto SmartPEME
SmartPEME é un novo modelo
de servizo orientado á mellora competitiva das PEME e á procura
dunha melloría nas vendas e na eficacia e eficiencia das tarefas,
que abre novos eidos de actuación e acada novos grupos de interese
coma os emprendedores, as asociacións empresariais e os axentes de
dinamización en concellos.
O devandito obxectivo, nas oficinas
do Porriño, Cambados, Pontevedra, Lalín, Ponteareas, Vigo, A
Estrada e Barro, abrangue as seguintes actividades: itinerarios de
obradoiros temáticos con diversos niveis de dificultade adaptados ás
necesidades das empresas, eventos de networking trimestrais coa
participación de profesionais de prestixio, colaboración con
asociacións e promoción de alianzas institucionais, especialización
sectorial dos asesores en función das necesidades da súa área de
influencia, kits de asesoramento en novas tecnoloxías a
emprendedores, identificación e difusión das necesidades TIC aos
provedores de solucións para as PEME e, tamén, impulso de novas
carteiras de servizos de asesoramento.