A quinta edición de Galetiktokers 2024 entregou os seus premios

Fomentar a creación de vídeos en galego con novos formatos e darlle visibilidade á comunidade galega de tiktokers é o obxectivo da quinta edición do certame Galetiktokers, organizado polos departamentos de Xuventude e Normalización Lingüística do Concello de Ames. Deste xeito, o pasado sábado celebrábase a gala para entregar os galardóns aos premiados, o acto levouse a cabo na Casa da Cultura do Milladoiro e estivo presentada e dirixida polos creadores de contido en galego, Nuria Grandío e Rodri Míguez, e amenizado polo rapeiro amesán Big Meu.
Indo ao palmarés: Punheta, Galibrownie, Mil e un instrumentos, As princesas tamén falan galego, Ven falar galego e Fitness da nosa terra son os vídeos gañadores do Galetiktokers 2024.
No evento estiveron presentes: o alcalde de Ames e concelleiro de Normalización Lingüística, Blas García, a concelleira de Mocidade, Carmen Porto, e concelleiros do Goberno municipal, así como concelleiros dos grupos municipais do Partido Popular e do BNG.
Entre as 39 pezas audiovisuais, presentadas por arredor de 80 mozos participantes de Ames e doutras localidades de Galicia, repartíronse seis premios de 300 euros, que suman un total de 1.800 euros. Na primeira categoría (mozas e mozos de 13 a 17 anos) presentáronse 10 vídeos, mentres na segunda categoría (mozas e mozos de 18 a 35 anos) houbo 29 vídeos admitidos. Nesta edición participou alumnado de centros de ensino de Bertamiráns, Lugo e Vilagarcía de Arousa, entre outras localidades.
Nesta quinta edición o xurado estivo composto polos creadores de contido en redes Nuria Grandío López e Rodrigo Míguez Novoa xunto coa especialista en comunicación audiovisual Noelia Francisco Lens. En representación do Concello de Ames, actuou como secretaria a técnica de Normalización Lingüística, Rosa Moreiras Cuñarro.
Na primeira categoría (mozos de 13 a 17 anos) acordouse por unanimidade outorgarlle un premio de 300 euros a peza Punheta, de Luna Gouvea Diz, Paula Rubianes Miguéns, Irene Abad Señoráns e Xulia Leiro Silva. Dentro desta mesma categoría tamén foi premiada con outros 300 euros a peza Galibrownie, de Lara Bazarra Souto, Candela Calo Romero e Alejandra Fernández Capelo.
Na segunda categoría (mozos de 18 a 35 anos) acordouse, tamén por unanimidade, premiar con 300 euros á peza Mil e un instrumentos, de Miguel Barbazán Lesta. Nesta mesma categoría tamén foi galardoado cun premio de 300 euros o vídeo As princesas tamén falan galego, de Antía López Castro.
Engadir que os outros dous premios, escollidos polo público a través do Instagram de Xuventude Ames, foron para a peza Ven falar galego, con 563 votos, e Fitness da nosa terra, con 349 votos. Estas dúas creacións foron premiadas con 300 euros cada unha. Ven falar galego foi elaborado por Sara Briones de la Barrera, Antía Paz Varela, Paula González Sabugueiro e Lucía Rubianes Miguéns. Por outra banda, os creadores de Fitness da nosa terra foron Diego Vázquez Feijoo e Mario Domínguez Rodríguez.