A rede de Vodafone rexistrou unha suba do 50% no tráfico de datos 5G en Noiteboa e no Nadal

A rede de Vodafone España rexistrou un aumento do 5% no uso de datos os días 24 e 25 de decembro respecto ás mesmas datas do ano anterior. O incremento máis significativo do uso de datos produciuse na tecnoloxía de rede 5G, que se incrementou un 50% máis respecto ao Nadal de 2023, segundo fixo saber a operadora no seu balance, engadindo que “estes datos confirman que a rede móbil mantense como o medio preferido polos usuarios para, entre outras cousas, felicitar as festas do Nadal”.
Vodafone tamén fixo saber que durante a tarde do día de Nadal produciuse o período de maior actividade no uso de datos, cun incremento do 5% respecto ao ano pasado alcanzando o máximo tráfico ás 22.00 horas.
Por outra banda, o tráfico de voz incrementouse en Noiteboa de forma significativa respecto ao ano anterior. En concreto, os minutos de voz incrementáronse un 15%, fronte á redución do -20% na Noiteboa de 2023 debido a que foi domingo e en fin de semana o tráfico de voz tende a reducirse. A hora de maior tráfico de voz, do mesmo xeito que no Nadal de 2023, produciuse como vén sendo habitual ás 12.00 da mañá.
En canto ao uso dos datos móbiles para as distintas aplicacións, cabe apuntar o comportamento de WhatsApp, servizo que viu incrementado o seu uso nun 50% durante todas as horas do día 24 e nun 20% durante o día 25.